ප්‍රබෝධා හෙට්ටිආරච්චි
රට තුළ උත්සන්න වී ඇති කොවිඩ් තත්ත්වය හමුවේ රට වසාදමන ලෙස දේශපාලන, ආගමික, වෘත්තිය සමිති, සිවිල් සංවිධාන ආදී බොහෝ පාර්ශ්වයන් විසින් ජනාධිපතිවරයාගෙන් සහ අගමැතිවරයාගෙන් දිගින් දිගටම ඉල්ලීම් කරන පසුබිමක ඉදිරිය පිළිබඳ තීරණයක් ගැනීම සඳහා කොවිඩ්-19 පැතිරීම වැළැක්වීමේ කාර්ය සාධක බළකාය ජනාධිපතිවරයාගේ ප්‍රධානත්වයෙන් අද (20) රැස්වීමට නියමිතව තිබේ.
අද කමිටු රැස්වීමේදී ඇතැමි විට මෙම සති අන්තයේ සීමා තවදුරටත් දැඩි කිරීමක් හෝ ඉදිරි කාලය පිළිබද තීරණයක් ගනු ඇති බව වාර්තා වේ.
නාගරික සහ තදාසන්න ප්‍රදේශවල ඊයේ වනවිට ජනතාව අසීමිත ලෙස භාණ්ඩ රැස්කරගනු දක්නට හැකිවිය. අත්‍යාවශ්‍ය භාණ්ඩ අලෙවිසල්වල රාක්ක හිස්ව තිබෙනු සුලභ දසුනක් විය.
රට පුරා නගර 65කට ආසන්න සංඛ්‍යාවක් මේ වනවිට ස්වයං-හුදෛකලා ක්‍රියාමාර්ගයකට එළැඹ තිබෙන අතර ලබන 31 වැනිදා පමණ වනතෙක් ඇතැම් නගර වසා තැබීමට වෙළෙඳ සංගම් තීරණය කර ඇත.
බොහෝ රාජ්‍ය ආයතන හා ඇතැම් පෞද්ගලික ආයතන ද වසා දමා ඇති අතර නිවසේ සිට වැඩ කිරීමේ ක්‍රියාමාර්ගයකට සහ අවම සේවක සංඛ්‍යාවකින් සේවා ක්‍රියාත්මක කිරීමට කටයුතු කර ඇත.
ලබන 31 වැනිදා තෙක් ක්‍රියාත්මක කර ඇති සංචරණ සීමාවලින්් එක් සීමාවක් වූ කඩසාප්පු සංකීර්ණ වසා තැබිය යුතුය යන සීමාව ලිහිල් කිරීමට ඊයේ පියවර ගෙන තිබූ අඅතර ඒ අනුව එවැනි ස්ථානයක සිටිය හැකි ධාරිතාවෙන් 25%ක් පාරිභෝගිකයන් වෙත සේවා සැපයීමට අවස්ථාව සලසා දී ඇත.
