වයස අවුරුදු 60ට වැඩි මෙරට පුද්ගලයින් හාරලක්ෂ පනස් දහසකට අධික පිරිසක් මෙතෙක් කිසිදු එන්නත් මාත්‍රාවක් හෝ ලබාගෙන නොමැති බව ග්‍රාම නිලධාරීන් ඇතුළු ගම් මට්ටමේ ක්ෂේත්‍ර නිලධාරීන් කළ සොයා බැලීමකින් අනාවරණය වී ඇත .
ස්වදේශ කටයුතු අමාත්‍යාංශයේ ලේකම්, එම්.එච්.එම්. චිත්‍රානන්ද මහතා මාධ්‍ය වෙත සඳහන් කර ඇත්තේ , පුද්ගලයින් හාර ලක්ෂ පනස් පන් දහස් පන්සිය තිස් නව දෙනෙකු කිසිදු එන්නත් මාත්‍රාවක් ලබා නොගත් බවට මේ වනවිට තහවුරු වන බවය.
එන්නත් මාත්‍රා ලබා නොගත් 60ට වැඩි පුද්ගලයින් සඳහා විශේෂ එන්නත්කරණ වැඩසටහනක් අද(24) සිට ආරම්භ කරන බව ස්වදේශ කටයුතු අමාත්‍යාංශයේ ලේකම්වරයා පැවසුවේය .
ඔහු සඳහන් කළේ, යුද හමුදාව සහ සෞඛ්‍ය අංශ ඒකාබද්ධව එම වැඩපිළිවෙළ ක්‍රියාවට නැංවෙන බවය.
ලද තොරතුරු මත එන්නත්කරණයට ලක්නොවූ මෙම පිරිසෙන් එන්නත්කරණ මධ්‍යස්ථාන වෙත පැමිණිය නොහැකි පුද්ගලයින් සඳහා ජංගම එන්නත්කරණය මගින් ද, සෙසු පුද්ගලයින් සඳහා එන්නත්කරණ මධ්‍යස්ථානවලදී ද එන්නත්කරණයට පියවර ගෙන තිබේ .
අමාත්‍යාංශ ලේකම්වරයා වැඩිදුරටත් සඳහන් කළේ, දිස්ත්‍රික්ක සඳහා වෙන් කර ඇති එන්නත් වර්ග අනුව, එන්නත්කරණයට පියවර ගන්නා බවය.
