එංගලන්තයේ මේ දිනවල පැවැත්වෙන පොදුරාජ්‍ය මණ්ඩලයීය ක්‍රීඩා උළෙලට සහභාගී වූ ශ්‍රී ලංකා කණ්ඩායමේ සාමාජිකයින් 10 දෙනෙක් මේ වනවිට අතුරුදන් වී ඇතැයි විදෙස් මාධ්‍ය වාර්තා කර තිබේ.
බර්මිංහැම්හිදී ඔවුන් අතුරුදන් වී ඇත්තේ සිය තරග අවසානයෙන් පසුව ය.
මෙරට ක්‍රීඩා බලධාරියෙක් උපුටා දක්වමින් AFP පුවත් වාර්තා කර ඇත්තේ ඔවුන් මෙලෙස අතුරුදන් වූයේ රැකියාවක් සොයාගෙන බ්‍රිතාන්‍යයේ රැඳී සිටීමේ උත්සාහයක් ලෙස වන්නට ඇති බව ය.
ක්‍රීඩකයින් 9 දෙනෙක් සහ කලමනාකරුවෙක් මෙලෙස අතුරුදන්වී ඇත. ජූඩෝ ක්‍රීඩිකා චමිලා ඩිලානි, ඇගේ කලමනාකරු අසේල ද සිල්වා සහ මල්ලවපොර ක්‍රීඩක ශනිත් චතුරංග අතුරුදන් වූ බව පසුගිය සතියේ වාර්තා විය. අතුරුදන් වූ සෙසු ක්‍රීඩකයින් කවුරුන් දැයි අනාවරණය කර නැත.
ඔවුන්ට මෙම තරගාවලිය වෙනුවෙන් මාස 6කට වලංගු වීසා බලපත්‍ර හිමිව තිබීම සහ එරට කිසිදු නීතියක් උල්ලංඝනය නොකිරීම නිසා පසුගිය සතියේ අතුරුදන් වූ තිදෙනාට ද නීතිමය ක්‍රියාමාර්ග නොගත් බව එරට පොලීසිය පවසා තිබුණි.
විදේශීය තරගාවලි සඳහා යන මෙරට ක්‍රීඩක ක්‍රීඩිකාවන් එම රටවල නතරවීමේ සිද්ධීන් මීට පෙර ද වරින් වර වාර්තා වී තිබෙන අතර එවන් සිද්ධියක් පාදක කරගනිමින් බිහිවූ සිනමාපටය ද අතිශය ජනප්‍රියත්වයට පත්විය.
