ශ්‍රී ලංකාවේ ක්‍රියාත්මක ජාත්‍යන්තර මූල්‍ය අරමුදලේ වැඩසටහන සම්බන්ධ දෙවැනි සමාලෝචනය සිදු කරන දින වකවානු සම්බන්ධයෙන් මෙතෙක් තීරණයක් ගෙන නොමැති බව ජාත්‍යන්තර මූල්‍ය අරමුදලේ ශ්‍රී ලංකා දූත මණ්ඩල ප්‍රධානී පීටර් බෘෘවර් මහතා පැවසීය.
“පළමු සමාලෝචනය අවසන් වුණේ 2023 දෙසැම්බර් මාසයේ. සාමාන්‍යයෙන් එය සිදුවන්නේ මාස 6කට වරක්. ඒ කියන්නේ අපේ කණ්ඩායමක් නැවතත් එනවා ඒ සඳහා…”
කෙසේ වෙතත් ශ්‍රී ලංකාවේ ආර්ථික ප්‍රතිසංස්කරණ ක්‍රියාවලියට ඉදිරි මාස කිහිපය වැදගත් බව ශ්‍රී ලංකා දූත මණ්ඩල ප්‍රධානී පීටර් බෘෘවර් මහතා පැවසීය.
“IMF වැඩසටහන මගින් ඉදිරිපත් කර ඇති වැදගත් කාරණා ඉටුකිරීම සම්බන්ධයෙන් දෙවැනි සමාලෝචනය ඔස්සේ තක්සේරු කරනවා”
ණය ප්‍රතිව්‍යුහගතකරණය සම්බන්ධයෙන් මාධ්‍යවේදියෙක් ඇසූ ප්‍රශ්නයකට පිළිතුරු දෙමින් ඔහු පැවසුවේ, එම ක්‍රියාවලිය සාර්ථක කර ගැනීමට නිල ණය හිමියන් සමඟ ඇතිකරගත් ප්‍රතිපත්තිමය එකඟතාව වැදගත් සංධිස්ථානයක් බවයි.
එසේම දේශීය ණය සම්බන්ධයෙන් එකඟතාවක් ඇති කරගැනීමත් වැදගත් බව ඔහු පැවසීය.
“දැන් වැදගත් වන්නේ එම එකඟතාවන් සම්බන්ධයෙන් අවසන් තීරණයකට එළැඹීම. ඒ කියන්නේ, නිල ණය හිමියන් සමඟ අවසන් එකඟතාවකට යෑම.”
