විදුලි බල මණ්ඩලය සේවකයන් වෘත්තිය ක්‍රියාමාර්ග ගෙන ඇත්තේ අත්තනෝමතිකව සහ හිතුවක්කාර ලෙස සිදුවන ප්‍රතිව්‍යුගතකරණයට විරුද්ධව යැයි ලංකා විදුලි බල මණ්ඩලයේ තක්ෂණික ශිල්පීන්ගේ සංගමයේ සභාපති කෝසල අබේසිංහ අප වෙත පැවසීය .
අවුරුදු සමයේ සූර්ය පැනල ක්‍රියාවිරහිත කිරීම: විදුලි පද්ධතියේ ස්ථායීතාව පවත්වා ගැනීමට ‘කළ යුතුව තිබුණේ’ කුමක් ද?
“පැහැදිලිව අපි ජනාධිපතිවරයාට සිහිපත් කරන්න ඕනේ ජනාධිපතිතුමාගේ ක්‍රියාවලියට විරුද්ධ නෙවෙයි මේ වෘත්තිය ක්‍රියාමාර්ගය අරගන්නේ හෝ විදුලි බල සේවකයින් පාරට බැහැලා ඉන්නේ. ජනාධිපතිවරයා යටතේ, ජනාධිපතිවරයා පවා රවටමින් ඉන්න ප්‍රතිව්‍යුගතකරණ කාර්යංශයේ අධ්‍යක්ෂ ජනරාල්වරයාගේ ක්‍රියාකලාපය මත ලංකා විදුලි බල මණ්ඩලය ඇද වැටෙමින් තිබෙන තත්ත්වයට විරුද්ධව තමයි මේ වෘත්තිය ක්‍රියාමාර්ගය අරන් තියෙන්නේ,” ඔහු පැවසීය.
වත්මන් ප්‍රතිව්‍යුගත කිරීම ජාතික ජන බලවේගයේ ප්‍රතිපත්තිවලට විරුද්ධ බව පෙන්වා දෙන වෘත්තිය සමිති නයකයා එම ප්‍රතිපත්තිවලට පිටුපාමින් විදුලි බල මණ්ඩලය “කෑලිවලට කඩා” ඇතැයි ප්‍රකාශ කළේය.
“විදුලි බල මණ්ඩලය ප්‍රතිව්‍යුගතකරණය වෙන්න ඕනේ වත්මන් ආණ්ඩුවේ, ජාතික ජන බලවේග ආණ්ඩුවේ ප්‍රතිපත්ති ප්‍රකාශයත් එක්ක… හැබැයි මේ ආණ්ඩුවේ ප්‍රතිපත්ති ප්‍රකාශයට පරිබාහිරව ගිහිල්ලා විදුලි බල මණ්ඩලය ප්‍රතිව්‍යුගත කරන ක්‍රියාවලිය සිද්ධ වෙනවා. ඒක ඉතා ම අත්නෝමතිකව සිද්ධ වෙන්නේ, ඒක බොහොම හිතුවක්කාර විදියට වෙන්නේ. විදුලි බල මණ්ඩල සේවකයින් මේ විරෝධය දක්වන්නේ අන්න ඒ ක්‍රියාවලියට විරුද්ධව. මේ ආණ්ඩුව බලයට පත් වෙන්න කලින් විදුලි බල මණ්ඩලය කෑලිවලට කඩන්නේ නැහැ කිව්වා. හැබැයි ප්‍රතිව්‍යුහගත කරනවා කෑලිවලට කඩන්නේ නෑ කියපු ආණ්ඩුව අද කෑලිවලට කඩලා ප්‍රතිව්‍යුහගතකරණය කිරීමට තමයි ලංකා විදුලි බල මණ්ඩලයේ වෘත්තිය සමිතිවල විරෝධය තියෙන්නේ,” ඔහු පැහැදිලි කළේ ය.
ලංකා විදුලි බල මණ්ඩලයට ප්‍රතිව්‍යුහගතකරණය පිළිබඳව එම මණ්ඩලයේ වෘත්තිය සමිතිවලට හෝ සේවකයන්ට කිසිදු ගැටලුවක් නොමැති බවත් එය සිදුවිය යුත්තේ ජාතික ජන බලවේගයේ ප්‍රතිපත්ති ප්‍රකාශයට අනුව බවත් වෘත්ති සමිති නායක කෝසල අබේසිංහ අවධාරණය කළේ ය.
‘විපක්ෂයේ ඉඳලා කියපු සටන් පාඨ වෙනුවෙන් තමයි අපි අදත් සටන් කරන්නේ’
විදුලි බල මණ්ඩලයේ වෘත්ති සමිති අදටත් සටන් කරන්නේ, වත්මන් රජය විපක්ෂයේ සිටියදී සටන් කළ අරමුණු වෙනුවෙන් බව ලංකා විදුලි බල මණ්ඩලයේ තක්ෂණික ශිල්පීන්ගේ සංගමයේ සභාපතිවරයා පැවසීය.
“මේ වෘත්තීය සමිති ඇතුළේ කිසි ම වෙලාවක දේශපාලන න්‍යාය පත්‍ර, දේශපාලන හඬ එන්නේ නැහැ. මේ හැමෝම කියන්නේ සාධනීය ප්‍රතිව්‍යුහගතකරණයක් කරන්න කියලා. අතිගරු ජනාධිපතිතුමාට ගෞරවයෙන් සිහිපත් කරනවා ඔබතුමා තර්ජනය කරලා පීඩාවට පත් කරන්න උත්සහ කළත් ඔබතු මාලා විපක්ෂයේ ඉඳලා කියපු සටන් පාඨ වෙනුවෙන් තමයි අපි අදත් සටන් කරන්නේ. ඒ සටන් පාඨ වැරදි මග යන හින්දා තමයි අපි සටන් කරන්නේ.
“ඔබතුමාට දීලා තියෙන්නේ වැරදි දත්ත. ඒ වැරදි දත්ත සහ වැරදි තේරීම් මත තමයි ඔබතුමා විදුලි බල මණ්ඩලයේ සේවකයින්ට සහ වෘත්තිය සමිතිවලට තර්ජනය කරන්නේ. ඒ නිසා බොහොම ගෞරවයෙන් මතක් කරනවා ඔබතුමා මොන තර්ජන, ගර්ජන අපිට යොමු කළත් අපිට ගන්න තියෙන පියවර ඉදිරියේදී අපි ගන්නවා.”
‘
ජනාධිපතිවරයාගේ ප්‍රකාශය හෙළා දකින ලංවිම නව සේවක සංගමයේ ප්‍රධාන ලේකම් ප්‍රියන්ත වික්‍රමසිංහ පවසන්නේ, කම්කරුවන්ගේ කරමතින් බලයට පැමිණි ආණ්ඩුවකින් මෙවැනි ප්‍රකාශ සිදුවන්නේ විධායක ජනාධිපති ක්‍රමයේ පවතින බලය හේතුවෙන් බව ය.
“තැපැල් සේවකයන්ටත් අපි දැක්කා කියනවා පඩි ගෙවන්නේ නෑ, පඩිය පවරා ගන්නවා, නිවාඩු දැම්මොත් ගෙවල්වල යවනවා කියලා තර්ජනය කරනවා. කම්කරුවන්ගේ කර මතින් ආපු ආණ්ඩුවක්, කම්කරු අති බහුතරයක් ඡන්දේ දුන්න ආණ්ඩුවක්, කම්කරු නායකයෝ ඉන්න ආණ්ඩුවක්, ඒගොල්ලෝ මේ තත්ත්වය පත් වුණා කියන්නේ මේ විධායක ජනාධිපති ක්‍රමයේ තියෙන ඔටුන්නේ රස්නේ තමයි කියන එක අපිට පේන්න තියෙන්නේ,” යැයි වෘත්තිය සමිති නායකයා අප වෙත පැවසීය.
විදුලි බල මණ්ඩලයේ ස්වාධිපත්‍යය ආරක්ෂා කිරීමට කළ යුතුව තිබුණේ පෙර පැවති පනත අහෝසි කිරීම බව ඔහු පෙන්වා දෙයි.
“ස්වාධිපත්‍යය තියා ගන්න ඒගොල්ලෝ කිව්වේ පනත අහෝසි කරනවා කියලා නේ. දැන් පනත අහෝසි කළේ නෑනේ, පනතට අණ්ඩ දාලානේ තියෙන්නේ. අණ්ඩ දාන්නේ නැතුව පනත අහෝසි කරලා සුබවාදී පනතක් ගේන්නකෝ. නැති නම් විදුලි බල මණ්ඩලය හැටියට ම තියලා ඔය ප්‍රතිව්‍යුගතකරණය කරන්න,” යැයි ප්‍රියන්ත වික්‍රමසිංහ අවධාරණය කළේ ය.
