බලහත්කාර අතුරුදහන් කිරීම් පිළිබඳ එක්සත් ජාතීන්ගේ කමිටුව ජිනීවාහි පැවැත්වෙන 29 වැනි සැසිවාරයේදී ශ්‍රී ලංකාවේ පළමු වාර්තාව සමාලෝචනය කරනු ඇත.
අධිකරණ හා ජාතික ඒකාබද්ධතා අමාත්‍ය හර්ෂණ නානායක්කාර විසින් සමාලෝචනය සඳහා ශ්‍රී ලංකා නියෝජිත පිරිස මෙහෙයවනු ලබන අතර, අධිකරණ හා ජාතික ඒකාබද්ධතා අමාත්‍යාංශය, නීතිපති දෙපාර්තමේන්තුව, ආරක්ෂක අමාත්‍යාංශය, කාන්තා හා ළමා කටයුතු අමාත්‍යාංශය, විදේශ කටයුතු, විදේශ රැකියා සහ සංචාරක අමාත්‍යාංශය, පොලිස් දෙපාර්තමේන්තුව, අතුරුදහන් වූවන් පිළිබඳ කාර්යාලය, වන්දි ගෙවීමේ කාර්යාලය, ජාතික සමගිය සහ සංහිඳියාව සඳහා වූ කාර්යාලය සහ ජිනීවාහි එක්සත් ජාතීන්ගේ ශ්‍රී ලංකා ස්ථිර මෙහෙවර යන ආයතනවල ජ්‍යෙෂ්ඨ නිලධාරීන්ගෙන් නියෝජිත පිරිස සමන්විත වනු ඇත.
විදේශ කටයුතු අමාත්‍යාංශයට අනුව, සමාලෝචනය ශ්‍රී ලංකා නියෝජිත කණ්ඩායම සහ බලහත්කාරයෙන් අතුරුදහන් කිරීම් පිළිබඳ කමිටුව අතර දෙමුහුන් අන්තර්ක්‍රියාකාරී සංවාදයක ස්වරූපය ගනු ඇත.
බලහත්කාරයෙන් අතුරුදහන් කිරීම්වලින් සියලු පුද්ගලයන් ආරක්ෂා කිරීම සඳහා වූ අන්තර්ජාතික සම්මුතියට ශ්‍රී ලංකාව 2015 දෙසැම්බර් 10 වැනිදා අත්සන් කළ අතර 2016 මැයි 25 වැනිදා සම්මුතිය අනුමත කළේය.
2023 අගෝස්තු 23 වවැනිදා, ශ්‍රී ලංකාව සම්මුතිය යටතේ සිය මූලික වාර්තාව ඉදිරිපත් කළ අතර, සම්මුතිය යටතේ තම බැඳීම් ක්‍රියාත්මක කිරීමට ගෙන ඇති පියවර ගෙනහැර දැක්වීය.
ඉදිරි සමාලෝචනයට බලහත්කාරයෙන් අතුරුදහන් කිරීම් පිළිබඳ කමිටුව විසින් ශ්‍රී ලංකාවේ මූලික වාර්තාව සළකා බැලීම ඇතුළත් වේ.
ශ්‍රී ලංකාවට අමතරව, 2025 ඔක්තෝබර් 02 වැනිදා දක්වා පැවැත්වෙන එහි 29 වැනි සැසියේදී මොන්ටිනිග්‍රෝ සහ බෙනින් ද කමිටුව විසින් සමාලෝචනය කරනු ලැබේ.
