නේපාලයේ කත්මණ්ඩු අගනුවර දසරත් ක්‍රීඩාංගණයේ දී පැවැත්වෙන 2019 දකුණු ආසියානු ක්‍රීඩා උළෙලේ මලල ක්‍රීඩා ඉසව් හි තෙවැනි දිනය අතිසාර්ථකව අද (05) නිමාවට පත්වූයේ ශ්‍රී ලංකාවට රන් පදක්කම් 4ක්, රිදි පදක්කම් දෙකක් සහ ලෝකඩ පදක්කම් 3ක් තිළිණ කරමින්.

ශ්‍රී ලංකා රන් පදක්කම් වැස්ස ආරම්භ කරමින් ලක්ෂිකා සුගන්ධි මීටර් 100 කඩුලු මතින් දිවීම ඉසව්වේ රන් පදක්කම ජයග්‍රහණය කරන්නට සමත් වුනේ තත්පර 13.68 කාලයක් සමඟිනි. මේ ඇය තරගාවලියේ දී ජයග්‍රහණය කළ දෙවැනි පදක්කමයි. මින් පෙර ඇය මීටර් 100 ඉසව්වේ ලෝකඩ පදක්කම දිනා ගත්තාය.

ඇය සමඟින් ඉසව්වට සහභාගී වූ ඉරේෂානි රාජසිංහ ලෝකඩ පදක්කම දිනා ගත්තේ තත්පර 14.18 කාලයක් වාර්තා කරමින් ඉසව්වේ වැඩි ගෞරවය ශ්‍රී ලංකාවට දිනා දෙමිනි. ඉසව්ව ආරම්භයේ ඇය වැරදි ආරම්භයක් ලබා ගත්තා යැයි සිතා තරමක් මන්දගාමී වූවද ලෝකඩ පදක්කමකින් ඉසව්ව අවසන් කිරීම සැබැවින්ම පැසසුම් සහගතය.

ඉසව්වේ දෙවැනි ස්ථානය දිනා ගනු ලැබුවේ ඉන්දීය ක්‍රීඩිකාවක් වන අපර්ණා රෝයි විසිනි. ඇගේ දක්ෂතාවය දැක්වුනේ තත්පර 14.13.

දිනයේ දෙවැනි රන් පදක්කම වාර්තා වන්නේ මීටර් 400 පිරිමි ඉසව්වෙනි. ඒ සඳහා සහභාගී වූ අරුණ දර්ශන සියලු ක්‍රීඩකයින්ට අභියෝගයක් වෙමින් රන් පදක්කම ජයග්‍රහණය කළේ තත්පර 46.69කින් ඉසව්ව අවසන් කරමිනි.

ඔහු සමඟින් ඉසව්වට සහභාගී වූ ලක්මාල් ප්‍රියන්ත තත්පර 46.79කින් ඉසව්ව අවසන් කළේ රිදි පදක්කම ජයග්‍රහණය කරමින් එම ඉසව්වේ ද වැඩි ගෞරවය ශ්‍රී ලංකාවට දිනා දෙමිනි.

මීටර් 400 කාන්තා ඉසව්වෙන් ද රන් පදක්කමක් ජයග්‍රහණය කරන්නට ඩිල්ෂි කුමාරසිංහ සමත් වුනේ තත්පර 53.40ක කාලයක් වාර්තා කරමින් ඇගේ හොඳම පෞද්ගලික කාලය ද අලුත් කරමිනි. ඇය සමඟ තරග කළ කෞෂල්‍යා මධුෂානි සිව්වැන්නා ලෙස ඉසව්ව අවසන් කළාය.

ආරම්භයේ දී ඩිල්ෂි මෙම ඉසව්ව සඳහා ඇතුළත් කර නොතිබූ අතර පසුගිය දා උණ රෝගයක් වැලඳීම නිසාවෙන් කත්මණ්ඩු නුවර රෝහලකට ඇතුළත් කළ මීටර් 200, මීටර් 400 සහ මීටර් 400×4 ඉසව්වේ හි රන් පදක්කම් බලාපොරොත්තුවක් වූ නදීෂා රාමනායක වෙනුවට ඇය මෙම ඉසව්ව සඳහා ඇතුළත් කෙරුණි.

අද දිනය නිමාවන විට පදක්කම් සටහනේ ඉන්දියාව ප්‍රථම ස්ථානය ඉන්දියාවද දෙවන ස්ථාන නේපාලයද ශ්‍රී ලංකාව තුන්වන ස්ථානයද හිමිකර ගෙන ඇත.