කොළඹ ලෝටස් පාර ප්‍රදේශයේ අද විරෝධතා පැවැත්වූ අන්තර් විශ්වවිද්‍යාලයීය ශිෂ්‍ය බල මණ්ඩලයේ සරසවි සිසුන්ගේ පා ගමනක් විසුරුවා හැරීමත් සමග සිසුන් 25 දෙනෙකු සහ ශිෂ්‍යාවක් අත්අඩංගුවට ගෙන තිබේ.
විරෝධතාව විසුරුවා හැරීමට පොලීසිය අද පස්වරුවේ ජල හා කඳුළු ගෑස් ප්‍රහාර එල්ල කළේ ය.
ප්‍රධාන මාර්ගය අවහිර කිරීම, නීති විරෝධී රැස්වීමක සාමාජිකයින් වීම සහ ජනාධිපතිවරණ පනත ප්‍රකාරව තහනම් පෙළපාලියක නිරතවීම යන චෝදනා යටතේ ඔවුන් අත්අඩංගුවට ගෙන කොළඹ අපරාධ කොට්ඨාශයට භාරදුන් බව පොලීසිය පවසයි.
මහපොළ ශිෂ්‍යාධාර දීමනාව නිසි පරිදි ලබා දෙන්නැයි ඉල්ලා සිසුන් මෙම විරෝධතාව කළ කර තිබූ අතර විරෝධතාව හේතුවෙන් අද පස්වරුවේ කොළඹ කොටුව ආශ්‍රිත දැඩි රථවාහන තදබදයක් ද දැකගත හැකිවිය.
