සමාජ මාධ්‍ය ජාල තුළ ජාතීන් අතර සංහිඳියාවට බලපාන පරිදි සහ අන්තවාදයටත් ත්‍රස්තවාදයටත් උඩගෙඩි දෙන පරිදි අසත්‍ය ප්‍රවෘත්ති ප්‍රකාශ කරන්නන්ට දඬුවම් කිරීම සඳහා දණ්ඩ නීති සංග්‍රහයට සංශෝධනයක් ගෙන එන බව මහජන ආරක්ෂාව පිළිබඳ අමාත්‍ය සරත් වීරසේකර මහතා ප්‍රකාශ කර සිටී .
කෙසේ වෙතත් මෙහිදී භාෂණයේ නිදහසට හෝ මාධ්‍ය නිදහසට කිසිදු බලපෑමක් කිරීමට අපේක්‍ෂා නොකරන බවද ඒ මහතා මාධ්‍ය වෙත පැවසීය .
මෙහිදී වැඩිදුරටත් අදහස් දැක්වූ ඒ මහතා මෙසේද පැවසීය
සමහර වෙලාවට අපි දකිනවා සමාජ මාධ්‍ය ජාලවල ඉතාම අසත්‍ය ප්‍රවෘත්ති ඒගොල්ලො විකාශය කරනවා, ප්‍රසිද්ධ කරනවා, ඒකෙන් ජාතීන් අතර තියෙන සංහිඳියාවට සම්පූර්ණ බලපාන විදියට. ඒවගේම තමයි අන්තවාදයට සහ ත්‍රස්තවාදයට උඩගෙඩි දෙන, මෙන්න මේ වගේ ප්‍රකාශ ඇත්ත වශයෙන්ම ජාතිද්‍රෝහී ප්‍රකාශ. ඉතිං ඒක නිසා ඒවගේ අයට දඬුවම් කිරීමට තමයි මේ දණ්ඩ නීති සංග්‍රහය නැවත වරක් සංශෝධනය කරන්නෙ, නැත්නම් යම් යම් දේවල් එකතු කරන්නෙ. අලුත් පනතක් හැටියට නෙවෙයි”
