රට ආර්ථික අර්බුදයෙන් ගොඩගැනීම සදහා අඛණ්ඩ සහයෝගයක් ලබා දෙන බව විපක්ෂ නායක සජිත් ප්‍රේමදාස මහතා මහ බැංකු අධිපතිවරයාට දන්වා තිබේ.
ඒ මුදල් අමාත්‍යංශ ලේකම් සහ මහ බැංකු අධිපති සමග, සමගි ජන බලවේගයේ මන්ත්‍රී කණ්ඩායම අද පැවැත් වූ සාකච්ඡාවකදීයි.
විපක්ෂ නායක සජිත් ප්‍රේමදාස මුදල් අමාත්‍යංශ ලේකම් මහින්ද සිරිවර්ධන, මහ බැංකු අධිපති නන්දලාල් වීරසිංහ යන මහත්වරුන්ගේ සහභාගීත්වයෙන් හමුව කොළඹ දී පැවැත්වුණි.
පැය 3කට අධික කාලයක් මෙම සාකච්ඡා සිදුකෙරුණු බව සමගි ජන බලවේගය පවසයි.
ඉදිරියේදී එල්ලවන ආර්ථික අභියෝගයන්ට සහාය ලබාදීම සදහා වගකීමෙන් කටයුතු කරන බවට ද විපක්ෂ නායකවරයා මෙහිදී පොරොන්දු වී තිබේ.
සමගි ජන බලවේගයේ පාර්ලිමේන්තු මන්ත්‍රීවරුන් වන ආචාර්ය හර්ෂ ද සිල්වා, කබීර් හෂීම්, ඉරාන් වික්‍රමරත්න යන මහත්වරුන් ඇතුළු පිරිසක් මෙම අවස්ථාවට එක්ව සිටියහ.
සාකච්ඡාවෙන් අනතුරුව පාර්ලිමේන්තු මන්ත්‍රී ආචාර්ය හර්ෂ ද සිල්වා මහතා කියාසිටියේ පවතින ආර්ථික අර්බුදයෙන් රට මුදාගැනීම සඳහා ඉදිරිපත් වන ඕනෑම පාර්ශ්වයකට මුහුණදීමට සිදුව ඇත්තේ බරපතළ අභියෝග රැසකට බවයි.
