පැතුම් වික්‍රමරත්න
ඇඳිරි නීතිය ඉවත් කර රට නැවත යථා තත්ත්වට පත් කිරීමට නම් , කොරෝනා රෝගීන් හඳුනාගැනීමේ පරීක්ෂණ ප්‍රමාණය තවදුරටත් ඉහළ නැංවිම අනිවාර්ය බව රජයේ වෛද්‍ය නිලධාරීන්ගේ සංගමය අවධාරණය කර සිටී.
මේ වනවිට සිදුකෙරෙන 500ක් පමණවූ දෛනික පරීක්ෂාවන් ප්‍රමාණයද කිසිසේත්ම ප්‍රමාණවත් නොමැති බවත් , එවැනි තත්වයක් තුල මෙරට කොරෝනා ව්‍යාප්තිය පිළිබඳව සත්‍ය තත්වය වටහා ගත නොහැකි බවත් එම සංගමයේ ලේකම් හරිත අලුත්ගේ මහතා මාධ්‍ය වෙත අද පැවසීය .
ශ්‍රී ලංකාව තුල දිනකට කොරෝනා පරීක්ෂාවන් 1500 ක් පමණ සිදුකල හැකි බව සෞඛ්‍ය අංශ සඳහන් කලත් , එම සංඛ්‍යාවට හෝ ලඟාවීමට තවමත් එම අංශ අපොහොසත් වී ඇති බවද අලුත්ගේ මහතා මෙහිදී සඳහන් කළේය .
පරීක්ෂාවන් ප්‍රමාණය වැඩි කිරීමට සෞඛ්‍ය අංශ පියවර නොගැනීම ගැටළුවක් බවත් , එසේ පරීක්ෂාවන් ප්‍රමාණය වර්ධනය නොකර ඇඳිරි නීතිය ඉවත්කිරීම අනතුරු දායක බවද අලුත්ගේ මහතා පැවසීය
