ඉන්දියාවට ලබාදුන් GSP සහනය අත් හිටුවීමට අමරිකානු ජනාධිපති ඩොනල්ඩ් ට්‍රම්ප් සූදානම් වන බව විදෙස් වාර්තා පවසයි.
ඒ පිළිබඳ තම තීරණය දැනුම් දෙමින් ට්‍රම්ප් එරට සෙනෙට් සභාවේ සභාපතිවරයාට සහ පාර්ලිමේන්තුවේ කථානායකවරියට ලිපියක් යවා තිබේ.
පසුගිය සඳුදා ජනාධිපති ඩොනල්ඩ් ට්‍රම්ප් සිය තීරණය මෙලෙස දැනුම් දුන් අතර එය ක්‍රියාත්මක වන්නේ අවම වශයෙන් දින 60 කට පසුවයි.
ඉන්දියාව වෙළෙඳ ගනුදෙනුවලදී ඇමරිකාවට සාධාරණ හා සමාන අවස්ථාවක් ලබාදීම සම්බන්ධයෙන් සෑහීමකට පත්විය නොහැකි නිසා මෙම තීරණය ගත් බව ජනාධිපති ඩොලන්ඩ් ට්‍රම්ප් පවසා ඇත.
ඉන්දීය රජය සමග මේ සම්බන්ධයෙන් පසුගිය සමයේ පැවැත්වූ සාකච්ඡා සාර්ථක නොවූ බවද ට්‍රම්ප් පවසා තිබේ.
වෙළෙඳ කටයුතු සහ බදු පැනවීම සම්බන්ධයෙන් චීනය සහ අමරිකාව අතර පසුගිය සමයේ මතභේදයක් නිර්මාණය විය.
එය විදෙස් මාධ්‍ය හඳුන්වා දී තිබුණේ වෙළෙඳ යුද්ධයක් ලෙසයි.
GSP සහනය නිසා ඉන්දියාව වර්ෂයකට ඇමරිකානු ඩොලර් බිලියන 5.6 ක භාණ්ඩ අමෙරිකාවට අපනයනය කළ හැකි විය.
ඉන්දියානු භාණ්ඩ 3500 කට මෙම බදු සහනය ලැබී තිබුණි.
චීන, ඇමරිකා වෙළෙඳ අර්බුදය විසඳ ගැනීමට තිබියදී ඉන්දියාව සම්බන්ධයෙන් මෙවැනි තීරණයක් ගැනීම විශේෂත්වයකි.
