ඔක්තෝබර් මාසයේ සිට ඉන්දියාව කොවිඩ් එන්නත් අපනයනය නැවත ආරම්භ කරන බව එරට සෞඛ්‍ය අමාත්‍ය මන්සුක් මාන්දවියා මහතා මාධ්‍ය වෙත සඳහන් කර ඇත
එක්සත් ජනපදය, ඉන්දියාව, ජපානය සහ ඕස්ට්‍රේලියාව යන රටවල් හතරේ රාජ්‍ය නායකයින්ගේ සමුළුවක් සඳහා අග්‍රාමාත්‍ය නරේන්ද්‍ර මෝදි අඟහරුවාදා එක්සත් ජනපදයේ වොෂිංටන් නුවරට පැමිණෙන අතරේදී මෙම නිවේදනය නිකුත් කෙරිණ.
රට තුළ එන්නත් කිරීමේ වැඩසටහන සඳහා ඉන්දියාවේ එන්නත් නිපදවන්නන් ඔක්තෝම්බර් මාසයේදී “මාත්‍රා මිලියන 300 කට වඩා නිෂ්පාදනය කරනු ඇතැයි” අපේක්ෂා කරන බවත් අතිරික්තය කොවිඩ් -19 ට එරෙහි ගෝලීය සටන වෙනුවෙන් වෙනත් රටවලට යැවීමට කටයුතු කරන බවත් අමාත්‍ය මාන්දවියා මෙහිදී පැවසීය.
“අපි ලෝකයට උදව් කරනවා, කොවැක්ස් වැඩසටහන තුළින් අපි අපේ වගකීම ද ඉටු කරනවා,” යනුවෙන් ඔහු වාර්තාකරුවන්ට පැවසීය.
කෝවැක්ස් යනු ගෝලීය එන්නත් සන්ධානය (Global Vaccine Alliance (Gavi)), ලෝක සෞඛ්‍ය සංවිධානය (WHO) සහ වසංගත රෝග සඳහා සූදානම් වීමේ නවෝත්පාදනයන් (Coalition for Epidemic Preparedness Innovations (CEPI)) විසින් මෙහෙයවනු ලබන ගෝලීය වශයෙන් සියලුම රටවලට කොවිඩ් එන්නත් ලබා දීම අරමුණු කරගත් බහුපාර්ශ්විය වැඩසටහනකි.
මෙම මාසයේදී දේශීය නිෂ්පාදකයින්ගෙන් එන්නත් මාත්‍රා මිලියන 260 ක් රජයට ලැබීමට අපේක්ෂා කරන බව අමාත්‍ය මන්දාවියා පැවසීය.
“නිෂ්පාදනය තවදුරටත් ඉහළ යනු ඇත. ජීව විද්‍යාත්මක ඊ (එක්සත් ජනපදය පදනම් කරගත් ඩයිනාවැක්ස් සහ බේලර් වෛද්‍ය විද්‍යාලය සමඟ එක්ව සංවර්ධනය කරන ලද කොවිඩ් එන්නතක්) සහ අනෙකුත් නිෂ්පාදකයින්ගේ එන්නත් ද වෙළෙඳපොළට එනු ඇත,” ඔහු පැවසීය.
2021 අවසානය වන විට ඉන්දියාව එරට වැඩිහිටි ජනගහනයට එන්නත් ලබා දීමට සැලසුම් කර ඇත. ජනවාරි මාසයේදී එන්නත් කිරීමේ වැඩ සටහන ආරම්භයේ සිට එරට අනුමත කළ එන්නත් වර්ග තුනෙන්ම මේ දක්වා මිලියන 818 කට වැඩි මාත්‍රා ප්‍රමාණයක් ලබා දී ඇත.
මේ වන විට මිලියන 609 කට වැඩි ප්‍රමාණයක් – එනම් ඉන්දියාවේ සුදුසුකම් ලත් ජනගහනයෙන් හරි අඩකටත් වඩා – අවම වශයෙන් එක් මාත්‍රාවක් හෝ ලබාගෙන ඇත. මේ වන විට පූර්ණ එන්නත්කරණයට ලක් වී ඇත්තේ එරට සුදුසුකම් ලත් වැඩිහිටියන්ගෙන් 21% ක් පමණි.
