කොතෙකුත් දුෂ්කරතා තිබුණද කිසිවෙකුටත් යට නොවෙන රටක් හදන්න නිර්භීත පියවර ගණනාවක් අපි ඉදිරියට තියලා තියෙනවා යැයි අග්‍රාමාත්‍ය මහින්ද රාජපක්ෂ මහතා අද(18 ) දින පැවැසීය.
සිය ජන්ම දිනය යෙදුණු අද දිනයේ කැලණිය දකුණ ඉවුර ජල සම්පාදන ව්‍යාපෘතිය දෙවන අදියරේ ජල පවිත්‍රාගාරය ජනතා අයිතියට පත් කරමින් අග්‍රාමාත්‍ය මහින්ද රාජපක්ෂ මහතා අවධාරණය කළේය.
තමන් ඇතුළු සිය රජය වැඩ කරනුයේ මේ රටේ ජනතාවගේ අනාගතය ගැන දින ගැනලා මිස ආණ්ඩුවේ දින ගණන බලලා නෙමෙයි යැයි අග්‍රාමාත්‍යවරයා මෙහිදී පෙන්වා දුන්නේය.
ඒ අනුව අපේ රටේ සියලුම ජනතාවට සුරක්ෂිත පානිය ජලය ලබාගැනීම 2024 වසරවනවිට සපුරා දීමට රජය සූදානම් බව අග්‍රාමාත්‍යවරයා මෙහිදී විශ්වාසය පළ කළේය.
ආණ්ඩුව අතීතයට දොස් කියමින් අඬඅඬා නොසිටි බව පැවසූ අග්‍රාමාත්‍යවරයා ගෙවුණ වසරක කාලය තුළ සතුරන් දිහා නොබලා, අපගේ ශක්තිය සහ ධෛර්යය දෙස බලමින් කටයුතු කළ බව කියා සිටියේය.
ආණ්ඩුවට දැන් දෙපැත්තක වගකීමක් ඉතිරිවෙලා තියෙනවා. එකක් තමයි 2015න් පස්සේ බිඳදාපු රට ආයේ ගොඩනඟන එක. අනෙක් වගකීම ලෝකයටම මුහුණදෙන්න සිද්ධවෙලා තිබෙන කොවිඩ් -19 අර්බුදයට මුහුණදෙමින් මේ රට ඉදිරියට ගෙනයෑම යැයි අග්‍රාමාත්‍යවරයා පැවැසීය.
