ගල් අඟුරු ටොන් 120000ක් රැගත් නෞකා දෙකක් දින කිහිපයක සිට මෙරට මුහුදු සීමාවේ නැංගුරුම්ලා ඇතැයි විදුලිබල වෘත්තීය සමිති අනාවරණය කළේය.
ඔවුන් පවසා සිටියේ අද (අප්‍රේල් 18) වන විට මුදල් ගෙවා ගල් අඟුරු තොගය නිදහස් කර නොගතහොත් මෙම නෞකා දෙක යලි හරවා යාමේ අවධානමක් ඇති බවයි.
කෙසේවෙතත් මෙරටට ළඟා වී ඇති ගල් අඟුරු රැගත් නෞකා සඳහා ගෙවීම් කිරීමට ශ්‍රී ලංකා මහ බැංකුව සිය එකඟතාව පළ කර ඇතැයි ලංකා විදුලිබල මණ්ඩලය සඳහන් කළේය.
ලංකා විදුලි බල මණ්ඩලයේ ජ්‍යෙෂ්ඨ නිලධාරියෙකු පැවසුවේ, අදාළ නෞකා සඳහා අවශ්‍ය ඩොලර් ලබා දීමට මහ බැංකුව කටයුතු කරන බවට දැනුම් දී ඇති බවයි.
එම මුදල් ලද විගස කඩිනමින් එම නෞකාවල ඇති ගල් අඟුරු ගොඩබෑමට කටයුතු කරන බව ද, ඔහු සඳහන් කළේය.
