ශ්‍රී ලංකා නිදහස් පක්ෂය සුරැකීමේ සංවිධානය අද කොළඹ සුගතදාස ගෘහස්ථ ක්‍රීඩාංගණයේ දී විශේෂ සමුළුවක් පැවැත්වීමට සූදානම් වන බව වාර්තා වේ.
ශ්‍රී ලංකා නිදහස් පක්ෂ අනුසාශිකා, හිටපු ජනාධිපතිනි චන්ද්‍රිකා බණ්ඩාරනායක කුමාරතුංග මහත්මිය එම සමුළුවේ මූලිකත්වය ගන්නා බව වාර්තා වෙයි.
ඇයගේ නායකත්වයෙන් යුතු බව කියන අපි ශ්‍රී ලංකා ව්‍යාපාරය නියෝජනය කරමින් එහි ලේකම් රුවන් රණතුංග මහතා සජිත් ප්‍රේමදාස මහතාට සහය පළකෙරෙන ගිවිසුමට සෙසු පක්ෂ හා සංවිධාන 57ක් සමගින් පසුගිය දා අත්සන් තැබීය.
රුවන් රණතුංග මහතා ශ්‍රී ලංකා නිදහස් පක්ෂයේ සංවිධායක ධුරයක් හොබවමින් සිටියි.
කෙසේවුව ද අද පැවැත්වෙන සමුළුව සඳහා ශ්‍රී ලංකා නිදහස් පක්ෂයේ කිසිදු සම්බන්ධතාවක් නොමැති බව පක්ෂ මහලේකම් දයාසිරි ජයසේකර මහතා නිවේදනයක් නිකුත් කර තිබුණි.
අද පැවැත්වෙන සමුළුව වෙනුවෙන් කුමාර වෙල්ගම මහතා ද කටයුතු කරන බව සඳහන් ය.
චන්ද්‍රිකා බණ්ඩාරනායක මහත්මිය විසින් අද විශේෂ ප්‍රකාශයක් කිරීමට නියමිත බව මීට පෙර වාර්තා පළවිය.
කෙසේවෙතත් අද පස්වරුවේ ශ්‍රී ලංකා නිදහස් පක්ෂයේ මධ්‍යම කාරක සභාව රැස්වන බවත් එහිදී පක්ෂයේ තීරණය උල්ලංඝනය කරන අය පිළිබඳ තීරණයක් ගැනීමට නියමිත බවත් වාර්තා වේ.
