ජාත්‍යන්තර මට්ටමේ නාවික හමුදා බලඇණියක් බිහිකිරීමේ චීන ජනපති ෂි ජිංපිංගේ සිහිනය සැබෑවක් කරමින් එරට තුළ නිෂ්පාදිත ගුවන් යානා ප්‍රවාහන නෞකාවක් නිල වශයෙන් භාවිතයට යොදවා තිබේ.
ෂැංඩොන්ග් නමැති මෙම ප්‍රවාහන නෞකාව චීන නාවික බලඇණියට අයත් දෙවැනි ගුවන් යානා ප්‍රවාහන නෞකාව වන අතර එරට නිෂ්පාදිත පළමු ගුවන් යානා ප්‍රවාහන නෞකාවයි.
චීනයේ පළමු ගුවන් යානා ප්‍රවාහන නෞකාව වන සෝවියට් යුගයේ නෞකාවක් වන ලියාඔනිං නෞකාව නැවත සකස් කර යුක්රේන රජයෙන් 1998 දී මිලදී ගන්නා ලද්දකි.
එක්සත් ජනපද නාවික හමුදාව බහුලව භාවිත කරන “කැටපෝල්ට්” තාක්‍ෂණය හා සසඳන විට සාපේක්ෂව පැරණි තාක්‍ෂණයක් භාවිත කරමින් චීන නෞකා දෙකම ගුවන් යානා දියත් කරයි.
ඒ පියාසර තට්ටුවේ කෙළවරේ වක්‍ර නැග්මක් සහිත ස්කයි ජම්ප් නමැති ක්‍රමයයි.
මෙම නෞකා දෙකටම යොදාගෙන ඇත්තේ චීනයේ වෙරළබඩ ප්‍රදේශ දෙකක නාමයන් ය.
