ප්‍රබෝධා හෙට්ටිආරච්චි
ඉදිරි වර්ෂා කාලයේදී පරාක්‍රම සමුද්‍රයේ වැව්බැම්මට හානි සිදුවීමේ දැඩි අවදානමක් මතුවී ඇති බව ප්‍රදේශයේ ගොවින් අනතුරු අඟවති.
පසුගියදා ආරම්භ වූ පරාක්‍රම සමුද්‍රයේ වැව්බැම්ම මත ඇවිදින මංතීරුවක් ඉදිකිරිමේ ව්‍යාපෘතිය තාවකාලිකව නවතා දැමුණි.
නමුත් එහිදී රළපණාවේ ගල් ඉවත් කළ අතර එම ගල් නැවත නිසිපරිදි ප්‍රතිසංස්කරණය කර නොමැති බැවින් මේ වනවිට වැව්බැම්මේ පස් සේදියමින් පවතී. ගොවීන් පෙන්වා දෙන්නේ මෙම තත්ත්වය මත ඉදිරියේදී වර්ෂා සමය ආරම්භවීමත් සමඟ වැව් බැම්මද විනාශ වී යාහැකි බවය.
පරාක්‍රම සමුද්‍රයේ වැව්බැම්ම මතින් ඇවිදින මංතීරුවක් ඉදිකිරීම ආරම්භ කිරීම හේතුවෙන් වැව්බැම්මේ ආරක්ෂාවට යොදා ඇති රළපණාවේ ගල්, වැව තුළට ඩෝසර් කිරීමක් සිදුවන බවත් ඒ හරහා වැව විනාශ මුඛයට යෑමේ දැඩි අවදානමක් මතුවී ඇති බවත් පවසමින් භික්ෂුන් වහන්සේලා, ප්‍රදේශවාසින් ඇතුළු පිරිසක් පසුගිය 27 වනදා විරෝධතාවයක නිරත වුණි.
විරෝධතාවයත් හේතුවෙන් ඇවිදින මංතීරුවේ ඉදිකිරීමේ කටයුතු තාවකාලිකව නවතා දැමීමට වාරිමාර්ග දෙපාර්තමේන්තුව තීරණය කළේය.
ඉදිකිරීම් අතහැර දැමීම හේතුවෙන් රළපෙණාවේ ගලවා දැමු ගල් එලෙසම පවතී. යළි රළපණාව ප්‍රතිසංස්කරණය කිරීමක් සිදුවී නොමැත.
ක්‍රි.ව 1587-1596 කාලය තුළ නිශ්ශංකමල්ල රජතුමා විසින් ඉදිකළ බව පවසන ගිම්හාන කුටිය වහා සංරක්ෂණය නොකළහොත් එය පරාක්‍රම සමුද්‍රයේ දියරැලි පහරට හසුවී පරාක්‍රම සමුද්‍රය තුළටම කඩා වැටීමේ අවදානමක් මතුවී ඇති බව ද ගොවිහු අනතුරු අඟවා සිටිති.
