පැතුම් වික්‍රමරත්න
ඩෙල්ටා කොවිඩ් ප්‍රභේදය , සෙසු කොරෝනා ප්‍රභේදයන්ට වඩා සියයට 100ක වේගයකින් සමාජය තුළ පැතිර යන බව මෙරට සෞඛ්‍ය අංශ අනතුරු අඟවා සිටී.
මේ පිළිබඳව වැඩිදුරටත් පැහැදිළ කරමින් අද උදෑසන පැවති මාධ්‍ය හමුවකට එක්වෙමින් රාජ්‍ය ඖෂධ නීතිගත සංස්ථාවේ සභාපති, විශේෂ වෛද්‍ය ප්‍රසන්න ගුණසේන මහතා මෙසේ පැවසීය
“අපි මේ වෛරසය සොයාගන්න උගුරේ සෙම පරීක්ෂණයක් කරනවා පීසීආර් කියලා. මේකෙ දී CT අගය කියලා එකක් ගන්නවා. අපි උගුරේ සෙම ගත්තාට පස්සේ 40 වතාවක් රත් කරනවා. ඒ 40 වතාවේ දී මේ වෛරසය හමුවුණේ නැත්නම් අපි කියනවා ඒ ලෙඩාට වෛරසය ආසාදනය වෙලා නෑ කියලා. අපි මුල අවස්ථාවේ දී අපි මේ වෛරසය එන කොට 32 – 33 වතාවක් වගේ මේක වර්ධනය කරාම තමයා වෛරසය හමුවුණේ. දෙවැනි රැල්ල එනකොට අපි සාමාන්‍යයෙන් 22 වතාවක් මේ වෛරසය වර්ධනය කරාම අපි ඒක දකිනවා. පසුගිය මාර්තු මාසයේ පමණ වෙනවිට සාමාන්‍යයෙන් 15 පාරක් පමණ 15 -12 වතාවක් වර්ධනය කරන විට වෛරසය හමුවුණා. පසුගිය දින කිහිපය වන විට උගුරෙන් ගත්ත සෙම එක්වරක් වර්ධනය කළ විට වෛරසය දකින්න පුළුවන්. කෙල බිඳිති මඟින් ප්‍රචාරය වුවත් උගුරේ තිබෙන වෛරස ප්‍රමාණය වැඩිවෙන විට එය බිඳිතිවලට යනවාට අමතරව වාතයට එකතු වේ.”
