විදුලි බලය නිපදවීම සඳහා , නවතම පරිසර හිතකාමී ක්‍රමවේදයක් ලොවට හඳුන්වාදීමට ඇමෙරිකාවේ ඔරිගන් ප්‍රාන්තයේ පොර්ට්ලන්ඩ් නගරය සමත්ව ඇත.
නගරයට ජලය සපයන ජලනල හරහා විදුලිය නිපදවීම මෙම සුවිශේෂී ක්‍රමවේදය වන අතර , ඉතා සුපිරිසිදු හා පුනර්ජනනීය බලශක්ති ප්‍රභවයක් වන මෙය මේ වනවිට ඇමෙරිකාවේ වෙනත් ප්‍රාන්ත වෙතද ව්‍යාප්තවෙමින් ඇත.
පොර්ට්ලන්ඩ් නගරය , ලුසිඩ් බලශක්ති ආයතනය සමග එකාබද්ධව මෙම පෙරළිකාරී නිපැයුම සිදුකර ඇති අතර ඉතා අඩුවියදමකින් බලශක්තිය නිපදවීමටද මේ හරහා පොර්ට්ලන්ඩ් නගරයට අවස්ථාව උදාවී ඇත.
දැනටත් නගරයට ජලය ගෙනයන ජල නල වල කොටසක් සඳහා ලුසිඩ් ආයතනය නිෂ්පාදනය කල විශේෂ බලශක්ති උත්පාදන නල සවිකිරීම මෙහිදී සිදුකෙරෙන අතර එම නල වලට ටර්බයින් යන්ත්‍ර සවිකර ඇත.
නල හරහා ජලය ගලා යනවිට එම බලයෙන් ටර්බයින කරකැවීම ආරම්භවන අතර විදුලි බලය නිෂ්පාදනය කෙරෙන්නේ එමගිනි .
