නැවියන් 43ක් සහ ගවයන් 5,800ක් සමග අතුරුදන් වූ වෙළෙඳ නෞකාවේ සිටි එක් නාවිකයෙකු බේරාගැනීමට සෝදිසි මෙහෙයුම්වල නිරත වූ ජපාන වෙරළාරක්ෂක බලකාය ඊයේ (03දා) සමත් විය.
ඔවුන් පවසන පරිදි මෙම නෞකාව නැගෙනහිර චීන මුහුදේදී සිව්වැනි කාණ්ඩයේ මයිසාක් සුළි කුණාටුවට හසුව ඇති අතර, නෞකාවේ සිටි නාවිකයන් සහ ප්‍රවාහනය කළ ගවයන් සමග එය සාගරයේ සැඟව ගොස් ඇත.
සෝදිසි මෙහෙයුම්වල නිරත ජපාන වෙරළාරක්ෂක බලකාය රාත්‍රියේ ජලයේ පාවෙමින් සිටි එක් පිලිපීන ජාතික නැවියෙකු සොයාගෙන ඇති අතර, ඔහු පැය ගණනාවක් ජලයේ පාවෙමින් සිට ඇති බව කියැවෙයි. කෙසේ වෙතත් ඔහුගේ සෞඛ්‍ය තත්ත්වය යහපත් බව වෙරළාරක්ෂක බලකාය පවසයි.
අඩි 438ක් දිග වෙළෙඳ නෞකාවේ පිලිපීන ජාතිකයින් 39ක්, නවසීලන්ත සහ ඔස්ට්‍රේලියානු ජාතිකයන් දෙදෙනා බැගින් සේවයේ නිරතව සිට ඇති අතර, නවසීලන්තයේ නේපියර් සිට චීනයේ ටැංෂාන් දක්වා යාත්‍රා කරමින් තිබී ඇති බව ජපාන, නවසීලන්ත සහ ඔස්ට්‍රේලියානු බලධාරීහු පවසති. පැනමා ධජය සහිතව යාත්‍රා කළ නෞකාව අගෝස්තු 17දා නවසීලන්තයෙන් පිටත් වී තිබේ.
