අසල්වැසියෙකු හා සමීප මිතුරෙකු ලෙසින් ශ්‍රී ලංකාව, නිදහස හා සමෘද්ධිය අත්කර ගැනීම සඳහා බංග්ලාදේශය සමඟ හැමවිටම එක්ව සිටී බව අගමැති මහින්ද රාජපක්ෂ මහතා බංග්ලාදේශයේ නිදහසේ ස්වර්ණ ජුබිලිය සැමරුමේදී එරට ජනතාව අමතමින් පැවැසීය.
බංග්ලාදේශයේ ජාතියේ පියා ලෙස හඳුන්වන බොංගොබොන්දු ෂෙයික් මුජිබුර් රහ්මාන්ගේ ජන්ම ශත සංවත්සරය සහ බංග්ලාදේශයේ නිදහසේ ස්වර්ණ ජුබිලිය සැමරීමේ උත්සවයේදී අග්‍රාමාත්‍ය මහින්ද රාජපක්ෂ මහතා කළ සම්පූර්ණ කතාව පහත දැක්වේ.
” බංග්ලාදේශ අගමැතිනි
අතිගරු ෂීක් හසීනා මැතිනිය,
බංග්ලාදේශ රජයේ ගරු අමාත්‍යවරුනි,
සම්භාව්‍ය අමුත්තනි,
නෝනාවරුනි, මහත්වරුනි,
ආයුබෝවන්!
බංග්ලාදේශ වැසියන්ට ඓතිහාසික වැදගත්කමක් ඇති අවස්ථාවකට සහභාගී වීම සඳහා අද ඩකා නුවරට පැමිණීමට ලැබීම ගැන මම සතුටු වෙමි. එබැවින්, මා සහ මගේ දූත පිරිසට කරන ලද සුහද ආරාධනයට වගේම, මා මෙරටට පැමිණි අවස්ථාවේදී දැක්වූ උණුසුම් පිළිගැනීම වෙනුවෙන් අතිගරු අගමැතිනි ෂෙයික් හසීනා මැතිනියට ස්තූතිවන්ත වෙමි.
COVID-19 වසංගතය හේතුවෙන් බොහෝ අභියෝගයන් මධ්‍යයේ වුවද, ශ්‍රී ලංකා ජනතාවගේ සහයෝගීතාවයේ පණිවුඩය සමඟ මම අද ඔබ සමඟ පෞද්ගලිකව සම්බන්ධ වී සිටිමි. බෙංගාල බොක්කෙහි සමීප අසල්වැසියන් ලෙස ශ්‍රී ලංකාව සහ බංග්ලාදේශය බලාපොරොත්තු සුන්වූ මෙන්ම ප්‍රීතිමත් අවස්ථාවලදී ද එකට එක්ව සිටිමු.
අපේ දෙරට අතර මිත්‍රත්වයට දීර්ඝ ඉතිහාසයක් තිබේ. බොහෝ විද්වතුන් විශ්වාස කරන්නේ බෙංගාලයෙන් පළමු සංක්‍රමණිකයන් ශ්‍රී ලංකාවට පැමිණියේ සමුද්‍රීය මාර්ග ඔස්සේ මීට වසර 2500 කට පෙර බවයි. ක්‍රි.පූ 6 වන සියවසේ සිට ශ්‍රී ලංකාව සහ බංග්ලාදේශය අතර ප්‍රබල වෙළඳ හුවමාරුවක් පැවති බවටත් විශ්වාස කෙරේ. එමෙන්ම, 1971 දී බංග්ලාදේශ මහජන ජනරජයේ නව ජාතිය සමඟ රාජ්‍ය තාන්ත්‍රික සබඳතා ඇති කරගත් පළමු රටවලින් එකක් වන්නේ ශ්‍රී ලංකාවයි.
බංග්ලාදේශයේ ජනතාව ඓතිහාසික සිදුවීම් දෙකක් සමරති. ඉන් එකක් නම් සියවසකට පෙර සිදුවූ ඔවුන්ගේ ජාතියේ පියා වන බොංගොබොන්දු ෂෙයික් මුජිබර් රහ්මාන්ගේ උපතයි. දෙවැන්න නම් අඩ සියවසකට පෙර බංග්ලාදේශයේ උපතයි. මෙම සිදුවීම් දෙකම සැමරිය යුතු අගනා ඓතිහාසික අවස්ථාවන් වේ.
සම්භාව්‍ය අමුත්තනි, නෝනාවරුනි මහත්වරුනි,
බොන්ගොබොන්දු ෂෙයික් මුජිබර් රහ්මාන් යනු බෙංගාලි ජනතාව, ඔවුන්ගේ භාෂාව සහ ඔවුන්ගේ සමස්ත යහපැවැත්ම වෙනුවෙන් සිය මුළු ජීවිතයම කැප කළ ප්‍රතිපත්ති සම්පාදකයෙකි. 1971 දී ‘බංග්ලාදේශය’ යන නව ජාතියක් බිහිවන තෙක් ඔහුගේ නිදහස් අරගලය දිගටම කරගෙන යාම ඔහුගේ අධිෂ්ඨානය විය.
අවාසනාවකට මෙන්, ඔහු තම ආදරණීය රට වෙනුවෙන් පෝෂණය කළ සිහින සැබෑ වන දිනය තෙක් ජීවත් වීමට ඔහුට නොහැකි විය.
ගරු අගමැතිතුමියනි,
1975 අගෝස්තු 15 වන දින සිදු වූ අතිමහත් පාඩුවේ වේදනාව මට වැටහේ. එදින බංග්ලාදේශ ජාතියට තම වීරයා මෙන්ම නිදහසේ පියා අහිමි විය. ඒ අතරම, ආදරණීය දියණියකට දෙමාපියන් සහ සහෝදර සහෝදරියන් අහිමි විය.
අගමැතිනියනි,
කෙසේනමුත් අපට යම් තාක් දුරට සැනසීමට ද හැකියාවක් තිබේ. ඒ සා විශාල පසුබෑමක් මධ්‍යයේ වුවද, ඔබගේ දක්ෂ නායකත්වය යටතේ බංග්ලාදේශය අඛණ්ඩව සමෘධිමත් වීමයි. එය ඔබේ ගෞරවනීය පියාගේ නාමයට ලැබෙන සැබෑම ගෞරවයයි.
ඔහුගේ උරුමයට උපහාරයක් ලෙස සහ බොංගොබොන්දු ෂෙයික් මුජිබර් රහ්මාන් මහතා කළ කැපවීමට ගෞරව දැක්වීමක් වශයෙන්, බෙංගාලි ගුරු රබීන්ද්‍රනාත් තාගෝර් විසින් රචිත කවියක කොටසක් මා උපුටා දක්වන්නම්:
( උපුටා දැක්වීම)
බියෙන් තොරව හිස කෙලින් තබාගෙන
සිටිනට හැකි තැන
දැනුම ද නිවහල් වේ
එවන් නිදහසේ ස්වර්ග රාජ්‍යයට
මාගේ පියාණනි,
මාගේ දේශය අවදි කරනු මැන.
(උපුටා දැක්වීම අවසන්)
සම්භාව්‍ය අමුත්තනි,
නෝනාවරුනි මහත්වරුනි,
මෙම 21 වන සියවසේදී අපට ආසියාවේ සමෘද්ධිය සඳහා වූ විශාල අභිලාෂයන් ඇත. එම අභිලාෂයන් ඉටුකරගැනීමට නම් නිදහස ලබා ගැනීම වෙනුවෙන් මුතුන්මිත්තන් කළ අසීමිත කැපවීම් පිළිබඳව අපගේ නව පරම්පරාවන් දැනුවත් විය යුතුය.
අසල්වැසියෙකු හා සමීප මිතුරෙකු ලෙසින් ශ්‍රී ලංකාව, නිදහස හා සමෘද්ධිය අත්කර ගැනීම සඳහා බංග්ලාදේශය සමඟ හැමවිටම එක්ව සිටී. ආර්ථික පරිවර්තනයන්, දරිද්‍රතාවය තුරන් කිරීම සහ තිරසාර සංවර්ධන අරමුණු සාක්ෂාත් කර ගැනීම යන කරුණු අප හමුවේ ඇති දැවැන්ත අභියෝග මධ්‍යයේ ඇති ප්‍රමුඛතම කාර්‍යයන් ය.
බොන්ගොබොන්දු ෂෙයික් මුජිබර් රහ්මාන් මහතාගේම වචනවලින් කිවහොත්, “ සාරවත් පොළොව බංග්ලාදේශය ලද දායාදයක්. අපගේ මෙන් සශ්‍රීක බිම් ඇත්තේ ලොව රටවල් කිහිපයකට පමණි ”. අපගේ රටවල් දෙකේ භූගෝලීය පිහිටීම් මගින් සමුද්‍රීය, නැව්ගත කිරීම, වෙළඳාම සහ මිනිසුන් අතර සම්බන්ධතා වැඩි දියුණු කිරීමට අපට ඕනෑ තරම් අවස්ථාවන් ලබා දේ.
අගමැතිනියනි,
බෙංගාල බොක්කෙහි “සමුද්‍රීය ආර්ථිකයක්” ප්‍රවර්ධනය කිරීමේ ඔබේ යෝජනාව සමුද්‍රීය කටයුතු පිළිබඳ අපගේ ප්‍රවේශය අඛණ්ඩව දිරිගන්වයි.
දකුණු ආසියාවේ නැගී එන ආර්ථික බලශක්තීන්ගෙන් එකක් ලෙස බංග්ලාදේශය සැලකේ. එය මගේ රටට ඉතා වැදගත් වෙළඳ හා ආයෝජන හවුල්කරුවෙකු ලෙස පවතී. පසුගිය දශක කිහිපය පුරාවට අපගේ හුවමාරු වේගයෙන් වර්ධනය වෙමින් පවතී.
කෘෂිකාර්මික ක්‍ෂේත්‍රය තුළ බංග්ලාදේශය ලබා ඇති දැවැන්ත ප්‍රගතිය ශ්‍රී ලංකාව තුළ විශාල අවධානයක් දිනාගෙන තිබේ. ඩකාහි සාර්ක් කෘෂිකාර්මික මධ්‍යස්ථානය හරහා ක්‍රියාකාරී භූමිකාවක් ඉටුකිරීමට අමතරව බංග්ලාදේශය අපගේ ආයතන සඳහා පුහුණුව හා ධාරිතා වර්ධනය කිරීමේ සහාය අඛණ්ඩව ලබා දෙයි. මෙම ක්‍ෂේත්‍රය තුළින් දෙරටේ වඩාත් සමීප සහයෝගීතාවයක් බෙදාහදා ගැනීම සඳහා ඔබේ තෘප්තිමත්භාවය මම අපේක්ෂා කරමි.
සම්භාව්‍ය අමුත්තනි, නෝනාවරුනි මහත්වරුනි,
පසුගිය අඩ සියවසක කාලය තුළ බංග්ලාදේශයේ ජනතාව දරිද්‍රතාවයෙන් හා ස්වාභාවික විපත් මධ්‍යයේ පැමිණි ඇදගන්නාසුළු ගමන සමෘද්ධිමත් ජාතියක් ගොඩනැඟීමේ සාක්‍ෂි දරයි.
අගමැතිතුමියනි,
මෙවන් පසුබිමක් තුළ, මා ඔබේ රජයටත් බංග්ලාදේශ ජනතාවටත් මාගේ හෘදයාංගම, අවංක හා උණුසුම් සුබ පැතුම් පිරිනැමීමට මම මෙය අවස්ථාවක් කර ගනිමි.
ස්තූතියි.”
