ප්‍රබෝධා හෙට්ටිආරච්චි
බස්නාහිර පළාතේ සහ හුදකලා කර ඇති ප්‍රදේශ හැර අනෙකුත් සියලු පළාත්වල පාසල් ඊයේ (11) දිනයේ විවෘත වූ පසු සිසුන්ගේ පැමිණීම සමස්තයක් ලෙස 51% ක් ලෙස වාර්තා වූ බව අධ්‍යාපන අමාත්‍යාංශය පවසයි.
අමාත්‍යාංශ ලේකම්වරයා ඊයෙ පැවති මාධ්‍ය හමුවකදී සඳහන් කළේ, ගුරුවරුන්ගේ සමස්ත පැමිණීම 88% ක් වන බවය.
2021 වසරේ පළමු පාසල් වාරය ඊයේ (11) ආරම්භ විය.
ඒ 02 වැනි ශ්‍රේණියේ සිට 13 වැනි ශ්‍රේණියේ සිසුන් සඳහා පමණි.
බස්නාහිර පළාත සහ හුදකලා කර ඇති ප්‍රදේශවල පාසල් හැර සෙසු පාසල් පමණක් ඊයේ විවෘත කෙරිණි.
ඇඳහැලෙන අධික වැසි මැද වුව ද උතුරුමැද පළාතේ දරු දැරියන් උනන්දුවෙන් පාසල් වෙත පැමිණ තිබුණි.
මේ අතර ඇතැම් පාසල් ආශ්‍රිතව දුරස්ථභාවය ආරක්ෂා නොකරගත් පාසල් ගුරුවරුන් පිරිසකට පොලීසිය අවවාද කරනු ද දක්නට ලැබුණි.
අධ්‍යාපන අමාත්‍ය ජී.එල් පීරිස් මහතා සඳහන් කළේ 02 ශ්‍රේණියේ සිට 13 ශ්‍රේණිය දක්වා පන්තිවල අධ්‍යයන කටයුතු ඒ අනුව ඊයේ දිනයේ සිට ආරම්භ කෙරෙන බවයි.
නිසි සෞඛ්‍ය මාර්ගෝපදේශ යටතේ පාසල් විවෘත කිරීම සිදු වූ අතර ඒ සඳහා විශේෂ වැඩපිළිවෙළක් හඳුන්වා දී ඇති බව අධ්‍යාපන අමාත්‍ය ජී.එල් පීරිස් මහතා සඳහන් කළේය.
මේ අතර, නැගෙනහිර පළාතේ පාසල් 32 ක් හැර අනෙක් සියලු පාසල් ඊයේ දිනයේ විවෘත කර තිබුණි.
