අමෙරිකානු පොලිස් නිලධාරියකු විසින් මහමඟ ගෙල පෑගීමෙන් මියගිය ජෝර්ජ් ෆ්ලොයිඩ්ට නව කොරෝනා වෛරසය ආසාදනය වී තිබූ බවට අවසාන මරණ පරීක්ෂණ වාර්තාවෙන් හෙළි වී තිබේ.
එම වාර්තාවේ දැක්වෙන්නේ ඔහුට කොරෝනා වෛරසය ආසාදිත වී තිබුණද ජෝර්ජ් ෆ්ලොයිඩ් මියගොස් ඇත්තේ මිනියාපොලිස් පොලිස් නිලධාරියා විනාඩි අටකට වැඩි කාලයක් දණ ගසා ඔහුගේ ගෙල සිරකරගෙන සිටීම නිසා ඇතිවූ හෘදයාබාධයකින් බවයි.
හෙනපින් ප්‍රාන්තයේ වෛද්‍ය පරීක්ෂක කාර්යාලය පවසන්නේ අප්‍රේල් 3 වන දින ෆ්ලොයිඩ්ට කොවිඩ් -19 රෝගය වැළඳී ඇති බවයි.
ඔහුගේ මරණයට කිසිදු ආකාරයකින් රෝගය දායක වූ බව එයින් ඇඟවෙන්නේ නැති බවද පෙන්වා දී ඇත.
ෆ්ලොයිඩ්ගේ මරණය සිදු වූ ආකාරය මිනීමැරුමක් ලෙස තීන්දු කරන ලද අතර, මේ සතිය මුලදී ඔහුගේ පවුලේ අය විසින් ඉල්ලා සිටි ස්වාධීන මරණ පරීක්ෂණයෙන් ලබාගත් නිගමනයට මෙය සමාන වේ.
