පොල්ගහවෙල පොලිස් වසමේ ඔරලියද්ද ප්‍රදේශයේදී පොල්ගහවෙල පොලිස් ස්ථානයේ නිලධාරීන්ට ලද තොරතුරක් මත කෑගල්ල බන්ධනාගාරයෙන් පලාගොස් සැඟව සිටි සැකකරුවෙකු බෝර 12 පතරොම් තුවක්කුවක් සමඟ අත්අඩංගුවට ගෙන ඇත.
අත්අඩංගුවට ගත් සැකකරු වයස අවුරුදු 38 ක් වූ, නාත්තන්ඩිය, තබ්බෝව ලිපිනයේ පදිංචිකරුවෙකි.
මෙම සැකකරු 2018.02.25 වන දින පොල්ගහවෙල පොලිස් වසමේදී පුද්ගලයෙකුට ගිණි අවියකින් වෙඩි තබා මනුෂ්‍ය ඝාතනයක් සිදුකිරීමක් සම්බන්ධයෙන් කෑගල්ල බන්ධනාගාරයේ රක්ෂිත බන්ධනාගාර ගතකර සිටියදී 2019.02.09 වන දින පලාගිය සැකකරුවෙකු වේ.
ඉහත සැකකරුට සැඟව සිටීම සඳහා ආධාර අනුබල දුන් සැකකරුවන් දෙදෙනකු පොලීසිය මගින් අත්අඩංගුවට ගෙන ඇත. ඒ 51 හැවිරිදි පුහුරියගැටබේරිය පදිංචි අයෙක් සහ 44 හැවිරිදි, ඔරුලියද්ද, පොල්ගහවෙල පදිංචිකරුවෙකි.
සැකකරුවන් අද දින පොල්ගහවෙල මහේස්ත්‍රාත් අධිකරණයට ඉදිරිපත් කෙරේ.
පොල්ගහවෙල පොලීසිය වැඩිදුර විමර්ශන පවත්වාගෙන යනු ලබයි.
