‘මත්ද්‍රව්‍ය හා මධ්‍යසාර’ සම්භන්ධයෙන් වන තම ප්‍රතිපත්තිය කුමක්ද යන්න ජනාධිපතිවරණයට පෙර රටට හෙළි කරන ලෙසත් එය තම ප්‍රතිපත්ති ප්‍රකාශන තුලට ඇතුලත් කරන ලෙසත් මධ්‍යසාර හා මත්ද්‍රව්‍ය තොරතුරු මධ්‍යස්ථානය ( adic ) සමග දුම්කොළ කර්මාන්ත අධ්‍යයන කේන්ද්‍රය මෙවර ජනපතිවරණයට ඉදිරිපත්වන සියලුම අපේක්‍ෂකයින්ගෙන් ඉල්ලා සිටී .
රටේ මීළඟ නායකත්වයට පත්වන පුද්ගලයා ජනතාවගේ සෞඛ්‍යයට සහ ආර්ථිකය යහපත් කිරීම සම්භන්ධයෙන් කටයුතු කරන ආකාරය ජනතාව දැනගත යුතු බවත් , දුම්කොළ අධ්‍යයන මධ්‍යස්ථානයේ අධ්‍යක්ෂ වෛද්‍ය මහේෂ් රාජසූරිය මහතා කොළඹදී පවතී මාධ්‍ය හමුවකදී පැවසීය .
මෙහිදී වැඩිදුරටත් අදහස් දැක්වූ රාජසූරිය මහතා මෙසේද පැවසීය .
” සිගරට් සහ වෙනත් දුම්කොළ නිෂ්පාදන ජනතාවගේ සෞඛ්‍යයට සහ සංවර්ධනයට මාරු පහරක් එල්ල කරනවා . එමනිසා දුම්කොළ භාවිතාව අවම කරණ අකාරය පිළිබඳව ,මෙන්ම දුම්කොළ සමාගම් සමග ඉදිරියේදී ගනුදෙනු කරන අකාරය පිළිබඳවත් ජනපති අපේක්ෂකයින් ජනතාවට හෙළි කල යුතුයි.
එය ජනතාවට ඉතා වැදගත් කරුණක් . ජනතාව තම අපේක්ෂකයින් තෝරාගැනීමේදී එය සලකා බලනු ඇති බව විශ්වාසයි.
මෙහිදී අදහස් දැක්වූ මධ්‍යසාර හා මත්ද්‍රව්‍ය තොරතුරු මධ්‍යස්ථානයේ විධායක අධ්‍යක්ෂක පුබුදු සුමනසේකර මහතා මෙසේ පැවසීය ,
දුම්කොළ සමාගම් සමග රජයක් සිදුකරන සියලු ගනුදෙනු විනිවිද පෙනෙන ආකාරයට සිදුවිය යුතුයි.
ජනපති අපේක්ෂකයින් ඒ ගැන තම ප්‍රතිපත්තියත් රටට හෙළිකිරීම ඉතා අවැදගත් .දුම්කොළ සමාගම් වලින් ඉදිරියේදී රජයේ වැඩකටයුතු වලට අනුග්‍රහය ලබනොගැනීමට ඉදිරියේ පත්වන ජනපතිවරයා වගබලා ගතයුතුයි.
