දම්පත් රණසිංහ
රජයට අයත් මන්නාරමේ පිහිටි ඉඩමක් අත්පත්කර ගැනීමක් සම්බන්ධයෙන් හිටපු ඇමති රිෂඩ් බදියුදීන් මහතාගෙන් අපරාධ පරීක්ෂණ දෙපාර්තමේන්තුව අද (16) පැය 04 ක පමණ කාලයක් දීර්ඝ ලෙස ප්‍රශ්න කරනු ලැබීය.
එම ඉඩම සම්බන්ධයෙන් තොරතුරු අනාවරණය වී ඇත්තේ කිරුළපන ඉසිපතන මාවතේ පිහිටි බදියුදීන් මහතාගේ හිතවතෙකුගේ නිවසකින් හමුවුණු ලැයැකියවිලි අතර වූ ඔප්පු අතර එම ඉඩමේද ඔප්පුවක් තිබීමෙනි. එහි ඉඩම් 250 ක පමණ ඔප්පු තිබී ඇති අතර වැඩි හරියක් ඔප්පු මන්නාරමේ පිහිටි ඒවාය. රජයේ ඉඩම් විවිධ ක්‍රම ඔස්සේ අත්පත්කර ගැනීම් මෙන්ම ජනතාවට අයත් ඉඩම් මිලදී ගත් ආකාරයේ ඔප්පු ඒ අතර තිබී ඇත.
එම ඔප්පුවලින් වැඩි හරියක් තිබී ඇත්තේ රිෂාඩ් බදියුදීන් මහතාගේ බිරිදගේ නමිනි. තවත් ඔප්පු විශාල ප්‍රමණයක් රිෂාඩ් බදියුදීන් මහතාට සම්බන්ධ සමාගමක නමින් තිබී ඇත. ඉඩම් සංවර්ධනය කිරීමේ මුවාවෙන් එම සමාගම නමින් ඉඩම් අත්පත් කර ගැනීම් රැසක්ද කර ඇතැයි අපරාධ පරීක්ෂණ දෙපාර්තමේන්තුවට විමර්ශන වලින් පෙනී ගොස් තිබේ.
අපරාධ පරීක්ෂණ දෙපාර්තමේන්තුව මේ සම්බන්ධයෙන් බදියුදීන් මහතාගෙන් ඉකුත් 14 වෙනිදාද දීර්ඝ ලෙස ප්‍රශ්න කර තිබුණි.
