පැතුම් වික්‍රමරත්න
කොරෝනා වෛරසයට එරෙහි ’ එන්නත මිලදී ගැනීම සඳහා රුපියල් බිලියන 10 ක ණය මුදලක් අපේක්ෂාවෙන් රජය, ලෝක බැංකුව සමඟ සාකච්ඡා ආරම්භ කර ඇත.
ආසියානු සංවර්ධන බැංකුව සහ යුරෝපා සංගමයෙන්ද මේ සඳහා අරමුදල් ලබාගැනීමේ හැකියාව සම්බන්ධයෙන් රජය අවධානය යොමු කර ඇති බවද වාර්තාවේ,.
එක්සත් ජාතීන්ගේ සංවිධානය සහ ලෝක සෞඛ්‍ය සංවිධානයේ මැදිහත් වීමෙන් කෙරෙන ජාත්‍යන්තර එන්නත් වැඩසටහන යටතේ මෙරට ජනගහනයෙන් සියයට 20කට එන්නත ලැබෙන බව ලෝක සෞඛ්‍ය සංවිධානයේ මෙරට කාර්යාලය දැනටමත් දැනුම් දී ඇත.
ආනයනය කරන එන්නත සහ එහි පිරිවැය ඵලදායීතාව මත අදාළ එන්නත් ආනයනය කිරීමේ වියදම තීරණය වන බව මේ සම්බන්ධයෙන් අදහස් දක්වමින් ඖෂධ නිෂ්පාදනය, සැපයීම හා නියාමන රාජ්‍ය අමාත්‍ය මහාචාර්ය චන්න ජයසුමන මහතා මාධ්ය වෙත ඊයේ පවැසීය.
ලෝක බැංකුව සමඟ සාකච්ඡා කරන අතරවාරයේදීම, එන්නත් මිලදී ගැනීම සඳහා ප්‍රදානයක් ලබාගැනීමට ඇති හැකියාව සම්බන්ධයෙන් අවධානය යොමු කර ඇතැයිද හෙතෙම කීය.
එන්නත් මිලදී ගැනීම සහ ඒවා ගබඩා කිරීමේ ක්‍රියාවලියේදී වැඩි වියදම් දැරීමට සිදුවනු ඇත්තේ ඍණ උෂ්ණත්ව තත්ත්ව යටතේ ඒවා ගබඩා කිරීමේ ක්‍රියාවලියට යැයි ද ඔහු කීවේය.
