කොවිඩ් රෝගය වේගයෙන් පැතිරයන මෙම කාලසීමාවේදී රට තුල, දුම්වැටි අලෙවිය තාවකලිකව හෝ තහනම් කිරීමට රජය පියවර ගත යුතුව ඇති බව මද්‍යසාර හා මත්ද්‍රව්‍ය තොරතුරු මධ්‍යස්ථානය (ADIC ) අවධාරණය කර සිටී .
කොවිඩ් ආසාධිතයින්ට බරපතල රෝගාබාධ ඇතිකිරීමට මෙන්ම කොවිඩ් වසංගත ව්‍යාප්තියටද ඍජුවම දායකවන මෙම දුම්පානය , තහනම් කිරීමට වගකිවයුතු අංශවල අවධානය මෙතෙක් යොමු නොවී තිබීම ගැටළුවක් වන බවද ADIC සභාපති වෛද්‍ය මහේෂ් රාජසූරිය මහතා ප්‍රකාශ කර සිටී .
මැයි මස 31 දිනට යෙදී ඇති ජාත්‍යන්තර දුම්වැටි නිවාරණ දිනය නිමිත්තෙන් අද පැවති මාර්ගගත මාධ්‍ය සාකච්ජාවට එක්වෙමින් රාජසූරිය මහතා මේ බව පැවසීය .
දුම්පානය කරන්නන් කොවිඩ් රෝගයට ගොදුරුවූ විට ඔවුන්ට බරපතල අකාරයේ සංකූලතා ඇතිවීමේ හැකියාව ඉතා ඉහළ බවත්, විශේෂයෙන්ම දුම්පානය කරන්නන්ගේ පෙනහළු දුර්වල තත්වයක් පැවතීම හේතුවෙන් තත්වය තවදුරටත් භයානක වන බවද ඒ මහතා පැවසීය .
ලෝක සෞඛ්‍ය සංවිධානයද මේ වනවිට දුම්පානයේ හා කොවිඩ් ව්‍යාප්තියේ ඇති මෙම සබඳතාවයන් පිළිබඳව දැඩිව අවධානය යොමු කර ඇති බවත් , ඒ නිසාම ඔවුන් , මෙවර දුම්වැටි නිවාරණ දින තේමාව ” දුම්පානය නැවතීමට කැපවෙමු ” යන තේමාව තෝරාගෙන ඇති බවත් රාජසූරිය මහතා පැවසීය .
මෙහිදී වැඩිදුරටත් අදහස් දැක්වූ එමහතා මෙසේද පැවසීය ,
” දුම්පානය කරන්නන් නිසා කොවිඩ් ව්‍යාප්තියද වේගවත් වෙනවා. උදාහරණයක් ලෙස එකම දුම්වැටිය කිහිපදෙනෙක් භාවිතා කරන අවස්ථා තිබෙනවා . එයින් ඉතා බරපතල ලෙස කොවිඩ් ව්‍යාප්තිය සිදුවෙනවා. එසේම දුම්පානය කරන්නන් බොහෝ විට තම මුහුණු ආවරණය නිතර ඉවත්කරමින් දුම්පානයේ යෙදෙනවා . එයද කෝවිඩ් ව්‍යාප්තියට බලපාන බව පැහැදිලියි .
ඇතැම් විට මෙම දුම්පානය කරන්නන් එක් ස්ථානයකට එක්වී දුම්පානය කරනවා . එහිදීත් එකිනෙකා අතර කොවිඩ් බෝවීම සිදුවීමට ඇති ඉඩ කඩ විශාලයි . දුම්පානයෙදී මුඛයෙන් , නහයෙන් , වේගවත් ලෙස දුම් පිටකිරීමක් සිදුකරනවා , ඒ හරහා කොරෝනා වෛරසය තවත් අයෙකු වෙත සම්ප්‍රේෂණය වීමේ අවස්තාව විශාලයි.”
මේ වනවිට රට තුල දුම්වැටි භාවිතය කෙමෙන් පහල යමින් පවතින නමුත් , දුම්කොළ සමාගම් ලබන ලාභය ඉහල යමින් ඇති බවද , රට තුල පවතින වැරදි බදු ප්‍රතිපත්ති මෙම තත්වයට හේතුවී ඇති බවද , මද්‍යසාර හා මත්ද්‍රව්‍ය තොරතුරු මධ්‍යස්ථානයේ විධායක අධ්‍යක්‍ෂ පුබුදු සුමනසේකර මහතා මෙම සාකච්ජාවට එක්වෙමින් පැවසීය .
මෙම තත්වය නිවැරදි කිරීමට වගකිවයුතු අංශ පියවර ගතයුතු බවද ඒ මහතා පැවසීය .
දුම්වැටි වලින් වසරකට ලැබෙන බදු අදායම රුපියල් බිලියන 92.9 වන නමුත් , දුම්කොළ භාවිතය හේතුවෙන් වසරකට සෞඛ්‍යයට හා ආර්ථිකයට වැයවන මුදල් ප්‍රමාණය රුපියල් බිලියන 214ක් වන බවද ඒ මහතා මෙහිදී පැවසීය .
