ලොවපුරා සිටින සියලුම ඇමරිකානු පුරවැසියන්ට ත්‍රස්තවාදී ප්‍රහාර සඳහා ඇති හැකියාවක් ඇති බැවින් ‘වැඩි අවධානයක් යොමු කරන ලෙස’ එරට රාජ්‍ය දෙපාර්තමේන්තුව අනතුරු ඇඟවීමක් කර තිබේ.
ලොව පුරා සිටින සියලුම අමෙරිකානු පුරවැසියන්ට රජය දන්වා ඇත්තේ “ලොව පුරා විවිධ ස්ථානවල ආතතීන් වැඩි වීම, ත්‍රස්තවාදී ප්‍රහාර සඳහා ඇති හැකියාව සහ අමෙරිකානු පුරවැසියන්ට සහ අමෙරිකානු මතයට එරෙහිව පෙළපාලි හෝ ප්‍රචණ්ඩකාරී ක්‍රියා” හේතුවෙන් ‘වැඩි අවධානයකින්’ කටයුතු කරන ලෙසය.
ඊශ්‍රායල-හමාස් යුද්ධයට ප්‍රතිචාර වශයෙන් මැදපෙරදිග පුරා විරෝධතා පැනනැඟී ඇති පසුබිමක බොහෝ පෙලපාලිකරුවන් අමෙරිකාවේ රාජ්‍යතාන්ත්‍රික මැදිහත්වීම් ද ඉලක්ක කර ගනිමින් තිබේ.
මෙවැනි වාතාවරණයක් මධ්‍යයේ ලොව පුරා අමෙරිකානුවන්ට බලපාන අනතුරු ඇඟවීම් නිකුත් කිරීම සැලකිය යුතු පණිවිඩයක් බව විදෙස් වාර්තා පෙන්වා දෙයි.
පසුගිය සතිය තුළ, රාජ්‍ය දෙපාර්තමේන්තුව ලෙබනනය සහ ඊශ්‍රායලය සඳහා සංචාරක උපදේශනය ඉහළම මට්ටමට ඔසවා තිබුණි. හදිසි නොවන එක්සත් ජනපද රජයේ නිලධාරීන්ට සහ පවුලේ සාමාජිකයින්ට පිටත්ව යාමට අවසර දී ඇත.
රාජ්‍ය දෙපාර්තමේන්තුව අවසන් වරට මෙවැනි අනතුරු ඇඟවීමක් නිකුත් කළේ 2022 අගෝස්තු මාසයේදී අල්-කයිඩා නායක අයිමන් අල්-සවාහිරි මරා දැමීමෙන් පසුව ය.
එහිදී අනතුරු අඟවා තිබුණේ “අල්කයිඩාවේ ආධාරකරුවන් හෝ ඊට අනුබද්ධ ත්‍රස්තවාදී සංවිධාන එක්සත් ජනපදයට, එහි ක්‍රියාකාරකම්, පිරිස් හෝ පුරවැසියන් වෙත පහර දීමට උත්සාහ කළ හැකිය” යනුවෙනි.
