රියදුරු බලපත්‍රයක් නොමැතිව වසර 31 ක් තිස්සේ මහ මග රථවාහන පැදවූ බේරුවල නගර සභාවේ එක්සත් ජාතික පක්ෂ මන්ත්‍රීවරයෙක් බේරුවල පොලීසිය ඊයේ (29) අත්අඩංගුවට ගෙන තිබේ.
ඒ ගාලු පාරේ බේරුවල මස්සල ඉන්ධන පිරවුම් හල ආසන්නයේදී ය.
එහි වාහන පරීක්ෂාවක නිරතව සිටි බේරුවල පොලීසියේ නිලධාරීන් දෙදෙනෙකුට රියදුරු බලපත්‍ර නොමැතිව වාහන ධාවනයේ නිරතව සිටි මෙම මන්ත්‍රීවරයාව කොටුවී ඇත.
අත්අඩංගුවට ගන්නා විට ඔහු පදවමින්සිට ඇත්තේ බී. එම්. ඩබ්ලිව්. වර්ගයේ සුඛෝපභෝගී මෝටර් රථයකි.
මෙම සැකාර මන්ත්‍රීවරයා වයස අවුරුදු 50 ක් පමණ වන අයෙකි.
රියදුරු බලපත්‍රයක් නොමැතිව වසර31ක් ඔහු වාහන පදවා ඇතැයි හෙළිවී ඇත්තේ ප්‍රශ්න කිරීම්වලදීය.
සංචාරක මගපෙන්වන්නෙක් ද වන ඔහු සුඛෝපභෝගී මෝටර් රථවලින් නගරයේ ගමන් කිරීම සුලභ දසුනක් බවත් මාර්ග නීති උල්ලංඝනය කිරීම්වලින් තොරව ඔහු රිය ධාවනය කිරීම හේතුවෙන් මෙතෙක් කළක් පොලීසියට හසුවී නැති බවත් විමර්ශනවලින් පෙනීගොස් තිබේ.
එසේම ඔහු පොලීසිය සමගද හිතවත් අයෙක් බව පැවැසේ.
මෙම පුද්ගලයා පදවමින් සිටි මෝටර් රථය පරීක්ෂාවට ලක්ව ඇත්තේ ඇදිරි නීතිය පැවතියදී මෝටර් රථයක් ධාවනය කිරීම හේතුවෙන් බව පොලීසිය සදහන් කරයි.
සැකකාර මන්ත්‍රීවරයාට එරෙහිව නඩුපැවැරීමට පියවර ගන්නා බව පොලීසිය කියයි
