වාර්තා අළුත් කරන ඉන්දියාවත් අභිබවා ගිය අපේ සුපිරි ක්‍රීඩා තරු

13 වැනි දකුණු ආසියානු ක්‍රීඩා උළෙලේ හයවැනි දිනය ලෙස ඊයේ (07) නිමා වූයේ ශ්‍රී ලංකා පදක්කම් සටහනට රන් පදක්කම් 7ක්, රිදී පදක්කම් 13ක් හා ලෝකඩ පදක්කම් 11ක් එක් කරමිනි. මේ වන විට සමස්ත පදක්කම් 172ක් සමඟින් ශ්‍රී ලංකා කණ්ඩායම පදක්කම් සටහනේ තුන්වැනි ස්ථානය දිනා ගැනීමට සමත්ව සිටී. 

තරගාවලියේ හයවැනි දිනය නිමා වන විට ශ්‍රී ලංකා කණ්ඩායම රන් පදක්කම් 24ක්, රිදී පදක්කම් 45ක් හා ලෝකඩ පදක්කම් 72ක් දිනා ගැනීමට සමත්ව ඇත. ඔවුන් සමස්ත පදක්කම් සටහනේ තුන්වැනි ස්ථානය ලබාගෙන සිටින අතර ඉන්දීය කණ්ඩායම තවමත් පෙරමුණ ගෙන ඇත්තේ රන් පදක්කම් 81ක්, රිදී පදක්කම් 41ක් හා ලෝකඩ පදක්කම් 23ක් දිනා ගනිමිනි. 

අද දිනයේ පළමු පදක්කම ලෙස ශ්‍රී ලංකා පදක්කම් සටහනට රන් පදක්කමක් එක් කිරීමට කාන්තා මැරතන් තරගය සඳහා සහභාගි වූ හිරුණි විජයරත්න සමත් විය. ශ්‍රී ලංකා ක්‍රීඩිකාවක SAG මැරතන් තරග ඉසව්වේ රන් පදක්කම දිනා ගත් පළමු අවස්ථාව ලෙස මෙය සටහන් විය. 

හෙල්ල විසිකිරීම කාන්තා තරග ඉසව්වේ දී ද ශ්‍රී ලංකා පදක්කම් මල්ලට තවත් රන් පදක්කමක් එක් කිරීමට ශ්‍රී ලංකා ක්‍රීඩිකා නදීශා ලේකම්ගේ සමත් විය. එම තරග ඉසව්වේ රිදී පදක්කම ද ශ්‍රී ලංකාව සතු වූ අතර එය නදීකා ලක්මාලි විසින් වාර්තා කළාය. 

ශ්‍රී ලංකා පදක්කම් සටහනට තවත් රන් පදක්කම් දෙකක් එක් කිරීමට කාන්තා හා පිරිමි මීටර් 400*4 සහය දිවීම් කණ්ඩායම සමත් වූයේ තියුණු අවසානයක් කරා තරගය රැගෙන යමිනි.

එම රන් පදක්කම් සමඟින් දකුණු ආසියානු මලල ක්‍රීඩා අණසක තමන් සතුකර ගැනීමට ශ්‍රී ලංකාව සමත් වූ අතර ඔවුන් මලල ක්‍රීඩාවෙන් රන් පදක්කම් 15ක් දිනා ගත් අතර ඉන්දීය කණ්ඩායම එහි දෙවන ස්ථානයට පත්ව සිටියේ රන් පදක්කම් 13ක් දිනා ගනිමිනි. 

අද දිනයේ පැවති වෙඩි තැබීම තරගවල දී මීටර් 25 rapid fire තරග ඉසව්ව සඳහා සහභාගි වූ ශ්‍රී ලංකා පිරිමි කණ්ඩායම එහි ලෝකඩ පදක්කම ජයග්‍රහණය කිරීමට සමත් විය. 

මලල ක්‍රීඩා තරගවලට අමතරව පිහිනුම් තරග ඉසව්වල අවසන් තරග කීපයක්  දිනයේ පැවති අතර එහි දී ද ශ්‍රී ලංකා කණ්ඩායම පදක්කම් රැසක් දිනා ගැනීමට සමත් විය. මීටර් 800 කාන්තා නිදහස් ආර තරග ඉසව්වේ රිදී පදක්කම ජයග්‍රහණය කිරීමට රමුදි සමරකෝන් සමත් වූ අතර රෙවාන් සේනාරත්න පිරිමි මීටර් 400 individual medley තරග ඉසව්වේ ලෝකඩ පදක්කම ජයග්‍රහණය කිරීමට සමත් විය. 

ශ්‍රී ලංකා පදක්කම් දඩයමට තවත් රිදී හා ලෝකඩ පදක්කමක් හිමිකර දීමට පිහිනුම් කණ්ඩායම සමත් වූ අතර රිදී පදක්කම පිරිමි මීටර් 100 පසුපස ආර තරග ඉසව්ව සඳහා සහභාගි වූ අකලංක පීරිස් සමත් විය. එහි ලෝකඩ පදක්කම හිමිකර ගැනීමට ශෙවින්ද ද සිල්වා සමත් විය. 

තරගාවලියේ බර ඉසිලීමේ තරග ඉසව් කීපයක් ද අද නිමා විය. ශ්‍රී ලංකා පදක්කම් සටහනට තවත් රන් පදක්කමක් එක් කිරීමට කාන්තා කිලෝග්‍රෑම් 76ට වැඩි බර පන්තිය නියෝජනය කළ තිමාලි හපුතැන්නේ සමත් විය. 

මේ අතර කාන්තා කිලෝග්‍රෑම් 76 බර පන්තියේ නව ශ්‍රී ලංකා වාර්තාවක් පිහිටුවීමට චතුරිකා වීරසිංහ සමත් වූ අතර ඇය snatch ක්‍රමයට කිලෝග්‍රෑම් 83ක් හා clean and jerk ක්‍රමයට කිලෝග්‍රෑම් 101ක් ඔසවමින් එම ශ්‍රී ලංකා වාර්තාව පිහිටුවීමට සමත් විය. ඇය එම ඉසව්වේ රිදී පදක්කම හිමිකර ගැනීමට සමත් විය. 

ශ්‍රී ලංකාවට තවත් පදක්කම් කීපයක් එක් කිරීමට අද පැවති මල්ලවපොර තරග ඉසව් සඳහා සහභාගි වූ ශ්‍රී ලංකා ක්‍රීඩක ක්‍රීඩිකාවන් සමත් විය. එහි දී කිලෝග්‍රෑම් 79 බර පන්තියේ රිදී පදක්කම දිනා ගැනීමට සුරේෂ් ප්‍රනාන්දු සමත් වූ අතර කිලෝග්‍රෑම් 70 බර පන්තියේ රිදී පදක්කම දිනා ගැනීමට අනිල් මුණසිංහ සමත් විය. කාන්තා තරග ඉසව්වල දී කිලෝග්‍රෑම් 76 බර පන්තිය නියෝජනය කළ රිවිහාරි වීරසිංහ එහි රිදී පදක්කම ජයග්‍රහණය කිරීමට සමත් විය. 

තරගාවලියේ හයවැනි දිනය නිමා වූයේ ශ්‍රී ලංකාවට රන් පදක්කම් 7ක්, රිදී පදක්කම් 13 ක් හා ලෝකඩ පදක්කම් 11ක් හිමිකර දෙමිනි. 

ශ්‍රී ලංකා කණ්ඩායම මේ වන විට රන් පදක්කම් 31ක්, රිදී පදක්කම් 58ක් හා ලෝකඩ පදක්කම් 83ක් සමඟින් සමස්ත පදක්කම් 172ක් දිනා සිටින අතර ඔවුන් පදක්කම් සටහනේ තවමත් තුන්වැනි ස්ථානයේ රැඳී සිටී. 

ඉන්දියාව ‍රන් පදක්කම් 110ක්, රිදී පදක්කම් 69ක් හා ලෝකඩ පදක්කම් 35ක් සමඟින් පෙරමුණ ගෙන සිටින අතර දෙවන ස්ථානය ලබාගෙන සිටින නේපාලය රන් පදක්කම් 43ක්, රිදී පදක්කම් 34ක් හා ලෝකඩ පදක්කම් 65ක් ජයග්‍රහණය කිරීමට සමත් ව ඇත.

1991 වසරෙන් පසු ශ්‍රී ලංකා මලල ක්‍රීඩා කණ්ඩායමක් SAG ඉතිහාසයේ දී වාර්තා කළ වැඩිම රන් පදක්කම් ප්‍රමාණය මෙවර තරගාවලියේ දී වාර්තා කරන්නට සමත් වූයේ රන් පදක්කම් 15ක අයිතිය ශ්‍රී ලංකාවට උරුම කර දෙමිනි. (ගියවර රන් පදක්කම් ගණන 9ක්)

ඒ අනුව අද දිනය අවසානයේ මලල ක්‍රීඩක ක්‍රීඩිකාවන් රන් පදක්කම් 6ක්, රිදි පදක්කම් දෙකක් සහ ලෝකඩ පදක්කම් 3ක් සමස්ත පදක්කම් සටහනට එකතු කරන්නට සමත් විය.

මලල ක්‍රීඩා තරගාවලියට ලොමු ඩැහැගන්වන අවසානයක් උරුම කර දෙන්නට මීටර් 4×400 ඉසව්වට සහභාගී වුන ශ්‍රී ලංකා ක්‍රීඩිකාවන් සමත් වූයේ ඉසව්වේ රන් පදක්කම විජයග්‍රහණය කරමිනි. 

ඔමායා උදයංගනි, ගයන්තිකා අබේරත්න, කෞෂල්‍යා මධුෂානි සහ ඩිල්ෂි කුමාරසිංහ එම සහය දිවීමේ කණ්ඩායමේ සාමාජිකාවන් විය. ඉසව්ව ආරම්භ කළ ඔමායා පළමු යෂ්ටි හුමාරුවේ දී ගයන්තිකාට යෂ්ටිය ලබා දුන්නේ තරමක පසුබෑමක් සහිතවයි. ගයන්තිකා ධාවන පටන් ගන්නා විටත් ඉන්දීය සහ පාකිස්තාන ක්‍රීඩිකාවන් ධාවනය ආරම්භ කර තිබූ අතර ඔවුන් දෙදෙනා පසුපස වේගයෙන් දිව ගිය ගයන්තිකා දෙවැනි යෂ්ටි හුමාරුවේ දී පරතරය තරමක් අවම කරන්නට සමත් වූවාය. 

ගයන්තිකා ගෙන ආ යෂ්ටිය  කෞෂල්‍යා ලක්මාලි විසින් ලබා ගත් අතර පාදයේ ආබාධයක් සහිතව වුවත් ඇය සාර්ථකව ඉදිරියෙන් ඇදුණු ඉන්දීය සහ පාකිස්තාන ක්‍රීඩිකාවන්ට අභියෝග කරමින් යෂ්ටිය ඩිල්ෂිට ලබා දුන්නේ ඩිල්ෂි තෙවැන්නා ලෙස අවසන් වටය ආරම්භ කරමිනි.

තරගය නැරඹූ සියලු ශ්‍රී ලාංකිකයන් රන් පදක්කම් බලාපොරොත්තු අතහැර සිටි මොහොතක ඩිල්ෂි ජයග්‍රාහී රේඛාව පෙනෙන මානයේ දී ඉන්දීය සහ පාකිස්තාන ක්‍රීඩිකාවන් පසුකර යමින් දුරින් තිබූ රන් පදක්කම් සිහිනයක් යථාර්ථයක් කරන්නට සමත් වූයේ ලොමු ඩැහැගන්වන අවසානයක් සනිටුහන් කරමිනි. තරග නිමි කාලය දැක්වුනේ මිනිත්තු 03:41.10කි.

අරුණ දර්ශන, රජිත රාජකරුණා, සෙනිර ගුණරත්න සහ ලක්මාල් ප්‍රදීප් සහභාගී වූ මීටර් 4×400 පිරිමි සහය දිවීමේ ඉසව්වත් මීට දෙවැනි වූයේ නැත. එම ඉසව්ව ආරම්භ කළ අරුණ දර්ශන සාර්ථකව දිව යමින් යෂ්ටිය රජිත රාජකරුණා වෙත ලබා දුන් අතර ඔහු විසින් එය සෙනිර ගුණරත්න වෙත ලබා දුන්නේ තරමක් පසුපසින් සිටිමිනි.

සෙනිර විසින් අවසන් යෂ්ටි හුවමාරුව සඳහා එය ලක්මාල් ප්‍රදීප් වෙත ලබා දුන් අතර ලක්මාල් අවසන් වටය ආරම්භ කළේ තෙවැන්නා ලෙසයි. කෙසේ නමුත් ඔහු ද අවසන් වටයේ දී ඉන්දීය සහ පාකිස්තාන ක්‍රීඩකයින්ට අභියෝග කරමින් ඉසව්ව අවසන් කළේ තියුණු අවසානයක් සමඟින් ප්‍රේක්ෂකයින්ගේ හදවත් මොහොතකට නතර කරමිනි. තරග නිමි කාලය ලෙස දැක්වුවේ මිනිත්තු 03:08.04කි.

දිනයේ වාර්තා වූ පළමු රන් පදක්කම වාර්තා වූයේ මැරතන් ඉසව්වට සහභාගී වූ හිරුණි විජයරත්න විසිනි. අධික සීතලක් පැවති උදෑසනක ඇය ඉතාමත් හොඳ පරතරයක් සහිතව ඉසව්ව අවසන් කළේ පැය 2:41.24.00. කාලයක් වාර්තා කරමිනි. මේ SAG මැරතන් ඉසව්වක දී ශ්‍රී ලංකාව දිනූ ප්‍රථම රන් පදක්කමයි.

ඉසව්වේ දෙවැනි ස්ථානය නේපාල ක්‍රීඩිකාවක් වන පුෂ්පා බණ්ඩාරි (පැය 02:50.11.00) විසින් ද, තෙවැනි ස්ථානය ඉන්දීය ක්‍රීඩිකාවක් වන Jyoti Gawate (පැය 05.52.44.00) විසින් ද ජයග්‍රහණය කළහ.

ඊයේ දිනය අවසානයේ දී රන් පදක්කම් වාර්තා වූ තවත් ඉසව්වක් වූයේ මීටර් 800 පිරිමි සහ කාන්තා ඉසව් ද්විත්වයයි.

එහි දී පිරිමි ඉසව්ව සඳහා සහභාගී වූ ඉඳුනිල් හේරත් හොඳ තරගයක් ලබා දෙමින් ඉසව්ව අවසන් කළේ (මිනිත්තු 01:50.52) රන් පදක්කම ජයග්‍රහණය කරමිනි. ඔහු 2016 වසරේ පැවති SAG තරගාවලියේ දී ද රන් පදක්කම ජයග්‍රහණය කරන්නට සමත් විය. ඔහු මෙම ඉසව්ව සඳහා ආබාධයක් සහිතව සහභාගී වූවත් රන් පදක්කමින් ඉසව්ව අවසන් කිරීම සැබැවින්ම පැසසුම් සහගතයි. 

මීටර් 800 කාන්තා ඉසව්වට සහභාගී වූ ඩිල්ෂි කුමාරසිංහ තෙවැනි රන් පදක්කම ජයග්‍රහණය කරන්නට සමත් වූයේ මිනිත්තු 02:06.18ක කාලයකින් ඉසව්ව අවසන් කරමිනි. මින් පෙර ඇය මීටර් 400 ඉසව්වේ සහ මීටර් 4×400 ඉසව්වේ දී ද රන් පදක්කම් ජයග්‍රහණය කළාය. මෙම ඉසව්වේ රන් සහ රිදි පදක්කම් සඳහා දැවැන්ත අභියෝගයක් ඩිල්ෂිට එල්ල කළේ ශ්‍රී ලංකාවේම ක්‍රීඩිකාවන් වන ගයන්තිකා අබේරත්න විසිනි. කෙසේ නමුත් කරට කර පැවති එම තරගයෙන් ගයන්තිකා දිනා ගත්තේ රිදි පදක්කමයි. ඇය වාර්තා කළ කාලය මිනිත්තු 02:08.52කි.

හෙල්ල විසි කිරීමේ ඉසව්වේ ආධිපත්‍ය ශ්‍රී ලංකාවට උරුමකර දෙන්නට නදීකා ලක්මාලි සහ නදීෂා ලේකම්ගේ සමත් විය. එහි දී නදීෂා විසින් මීටර් 55.02 දක්ෂතාවයක් සමඟින් රන් පදක්කම ජයග්‍රහණය කරන විට, මීටර් 54.41ක දුරක් වාර්තා කළ නදීෂා රිදි පදක්කම ජයග්‍රහණය කරන්නට සමත් විය.

කෙසේ නමුත් හෙල්ල විසි කිරීම පිරිමි ඉසව්වට සහභාගී වූ සුමේධ රණසිංහ තුන්වැනි ස්ථානයෙන් ඉසව්ව අවසන් කරමින් ලෝකඩ පදක්කම ජයග්‍රහණය කරන්නට සමත් විය. ඔහුගේ දක්ෂතාව දැක්වුනේ මීටර් 74.47ක්.

දිනයේ කිසිදු පදක්කමක් ශ්‍රී ලංකාව වෙනුවෙන් වාර්තා නොවූ ඉසව්ව බවට පත්වූයේ පිරිමි මැරතන් ඉසව්වයි, ඊට සහභාගී වූයේ ධම්මික අරුණසිරි ය.

ඒ අනුව අතිසාර්ථකව මෙවර දකුණු ආසියානු ක්‍රීඩා උළෙලේ මලල ක්‍රීඩා තරග අවසන් කිරීමට ඊට සහභාගී වූ ක්‍රීඩක ක්‍රීඩිකාවන් සමත් වූයේ රන් පදක්කම් 15ක්, රිදි පදක්කම් 12ක් සහ ලෝකඩ පදක්කම් 7ක් සමඟින් සම්පූර්ණ පදක්කම් 34ක් ශ්‍රී ලංකාව වෙනුවෙන් ජයග්‍රහණය කරමින්.