වැලිසර සුසාන භූමිය ආසන්නයේ දී ඊයේ (04) පෙරවරුවේ, සිදුවූ රිය අනතුරකින් පුද්ගලයෙකු ජීවිතක්ෂයට පත්ව තිබේ. අනතුරින් තුවාල ලැබූ තවත් තිදෙනෙක් රාගම ශික්ෂණ රෝහල වෙත ඇතුළත් කර ඇති බව සඳහන් වේ.
අවුරුදු 16ක් වූ තරුණයෙකු විසින් අදාළ අධි සුඛෝපභෝගී මෝටර් රථය ධාවනය කර ඇති බව පොලීසිය පැවසීය.
කොළඹ – මීගමුව ප්‍රධාන මාර්ගයේ වැලිසර සුසාන භූමිය ආසන්නයේදී ඊයේ පෙරවරු 9ට පමණ එම අනතුර සිදුව තිබුණි.
කොළඹ සිට මීගමුව දෙසට ධාවනය වූ අධි සුඛෝපභෝගී මෝටර් රථයක් මාර්ගයෙන් ඉවතට ධාවනය වී ප්‍රතිවිරුද්ධ දිශාවට ධාවනය වූ යතුරු පැදි දෙකක, ත්‍රීරෝද රථයක සහ මෝටර් රථයක ගැටී තිබේ.
වේගය පාලනය කර ගැනීමට නොහැකිව අනතුරු සිදුව ඇති බවට මූලික පරීක්ෂණවලදි අනාවරණ වී තිබේ.
අනතුරින් යතුරු පැදිකරුවෙකු මියගිය අතර, පසු පැදිකරු බරපතළ තුවාල ලබා රාගම ශික්ෂණ රෝහලට ඇතුළත් කෙරුණි.
තරුණයාගේ පියා පවසා තිබුණේ තමා වාහනය සෝදා තබා නාන කාමරයට ගිය අවස්ථාවේදී තම අවසරයකින් තොරව පුතා වාහනය රැගෙන ගොස් ඇති බවය.
සිද්ධිය සම්බන්ධයෙන් වැඩිදුර විමර්ශන ක්‍රියාත්මකය.
