(දම්පත් රණසිංහ)
වැලි කඳු වල වාහන ධාවනය ත්‍රාසජනක ක්‍රීඩාව මෙරටට හඳුන්වාදෙමින් එහි ප්‍රථම ධාවන පථය පථය කොළඹ වරාය නගරයේදී අද විවෘත විය .
කලම්බු ඩියුන්ස් ලෙස නම් කර ඇති මෙම ධාවන පථය ක්‍රීඩා ඇමති නාමල් රාජපක්ෂ සහ සංචාරක ඇමති ප්‍රසන්න රණතුංග යන මහත්වරුන්ගේ ප්‍රධානත්වයෙන් සහ ශ්‍රී ලංකා පොදුජන පෙරමුණේ මහ ලේකම් සාගර කාරියවසම් මහතාගේ සහභාගිත්වයෙන් විවෘත කෙරුණි.
කිලෝමීටර් 2ක් පමණ වූ ධාවන පථ 03කින් සමන්විත කලම්බු ඩියුන්ස් ධාවන පථය වරාය නගරයේ අක්කර 05ක පමණ භූමි ප්‍රදේශයක පැතිර තිබේ. නාමල් රාජපක්ෂ, ප්‍රසන්න රණතුංග යන අමාත්‍යවරුන් සහ සාගර කාරියවසම් මන්ත්‍රීවරයා මෙම වැලි කඳු සහිත මාර්ගය ඔස්සේ ධාවනය ත්‍රාස ජනක ධාවනයකද අද නිරත විය.
මෙරට මුල්ම ATV ධාවන පථය පිහිටා ඇත්තේ ගම්පහ දිස්ත්‍රික්කයේ. ගම්පහ බුත්පිටිය මාළිගාතැන්න ප්‍රදේශයේ මෙම ධාවන පථය පිහිටා තිබේ. එය කළුගල් කඳු අතර සැකසුනෙකි. අද කොළඹ වරාය නගරයේ විවෘත කෙරුණු වැලි කඳු මත ධාවනය කෙරෙන ATV ධාවන පථය මෙරට බිහිවුනු වැලි කඳු මත ධාවනය කෙරෙන ප්‍රථම ධාවන පථය වේ.
සංචාරක ඇමති ප්‍රසන්න රණතුංග මහතා පවසන්නේ මෙවැනි ත්‍රාසජනක ක්‍රීඩා මෙරටට වැඩි වශයෙන් සංචාරකයන් ආකර්ෂණය කර ගැනීමට හේතු වන බවයි.
