විදුලි බලේ අනවසර වැඩක් නිසා බිලියන 20ක පාඩුවක්!

Picture of අසංක

අසංක

ශ‍්‍රී ලංකා මහජන උපයෝගීතා කොමිෂන් සභාවේ අවසරයකින් තොරව හදිසි විදුලිය මිලදී ගැනීමක් සිදුකිරීම සඳහා විදුලිබල සහ බලශක්ති අමාත්‍යංශය මේ වනව්ට කටයුතු යොදමින් සිටින බවත් එය කිසිසේත්ම නීත්‍යානුකූල නොවන බවත් එම කොමිසම විසින් කැබිනට් අනුමත ප‍්‍රසම්පාදන කමිටුව වෙත දැනුම්දී ඇත.

2019 ජනවාරි 21 වනදා පුවත්පත් දැන්වීමක් පළකරමින් මෙගාවොට් 100ක හදිසි විදුලිය මිලදී ගැනීමක් සිදුකිරීම සදහා විදුලි බල මණ්ඩලය විසින් ටෙන්ඩර් කැදවා ඇති බවත් එය 2009 අංක 20 දරණ විදුලිබල පණත සහ 2016 අංක 02 දරණ ප‍්‍රසම්පාදන පනත උල්ලංඝණය කිරීමක් වන බවත් කොමිසම මෙහිදී දන්වා ඇත.

මෙගාවොට් 100ක විදුලිබලයක් පෞද්ගලික අංශයෙන් හදිසි මිලදී ගැනීම සදහා යොමු වුවහොත් විදුලිය බල මණ්ඩලයට වසරක් තුලදී දැරීමට සිදුවන අතිරේඛ වැයබර රුපියල් බිලියන 20ක් වනු ඇති බව බලශක්ති විශේෂඥයෝ පෙන්වාදේ.

මේ වසරේදී විදුලිය බල මණ්ඩලය රුපියල් බිලියන 80ක අලාභයක් ලබනු ඇතැයි ගණනය කර ඇති අතර උක්ත හදිසි විදුලිය මිලදී ගැනීම සදහා යොමු වුවහොත් එම පාඩුව රුපියල් බිලියන 100ක් දක්වා වැඩිවනු ඇතැයිද බලශක්ති විශේෂඥයෝ පෙන්වා දෙති.

පැතුම් වික්‍රමරත්න