Carbon Consulting Company (Pvt) Ltd මඟින් පිරිනමනු ලබන ජාත්‍යන්තරව පිළිගත් “Carbon Neutral Operations” තත්ව සහතිකය නාවික හමුදා මහ රෝහල (කොළඹ) හිමිකර ගැනීමට සමත් වූ අතර, ඊට අදාල සහතිකය අද (2019 ඔක්තෝබර් 15) නාවික හමුදා මූලස්ථානයේදී නාවික හමුදාධිපති, වයිස් අද්මිරාල් පියල් ද සිල්වා වෙත පිරිනමන ලදී.
මෙම අවස්ථාව සඳහා අධ්‍යක්‍ෂ නාවික වෛද්‍ය සේවා (රෝග විනිශ්චය සහ වලක්වාගැනීම), වෛද්‍ය කොමදෝරු ජනක මාරඹේ, නියෝජ්‍ය අධ්‍යක්‍ෂ නාවික මෙහෙයුම්, කපිතාන් අරුණ වීරසිංහ, ශ්‍රී ලංකා නාවික හමුදා මහ රෝහල (කොළඹ) අණදෙන නිලධාරි, කොමාණ්ඩර් පුබුදු ගුණසේකර සහ Carbon Consulting Company (Pvt) Ltd අයතනයේ නිලධාරින් පිරිසක් සහභාගිවී සිටියහ.
මෙම සහතිකකරණයට අදාල වූ ගණනය කිරීම් තිරසාර සංවර්ධනය සඳහා වූ ලෝක ව්‍යාපාරික කවුන්සලය සහ ලෝක සම්පත් ආයතනය සහ ප්‍රමිතකරණය සඳහා වූ ජාත්‍යන්තර සංවිධානය විසින් ප්‍රකාශිත ISO 14064-1:2019 ප්‍රමිතිකරණ මිනුම් සහ හරිතාගාර වායු ව්‍යුහය මෙන්ම ආයතනික සහ වාර්තා කිරීම්වලට අදාලව සිදු කරන ලදී.
