පිරිපහදු කිරීම සදහා බොරතෙල් තොග නොමැතිවීම හේතුවෙන් සපුගස්කන්ද ඉන්ධන පිරිපහදුවේ කටයුතු අද සිට නතර කිරීමට සිදුව ඇත්තේ ආණ්ඩුවේ දුර්වල තීරණ හේතුවෙන්වන බවට ඛනිජ තෙල් වෘත්තීය සමිති චෝදනා කර සිටී .
සමගි ඒකාබද්ධ වෘත්තීය සමිති බලවේගයේ කැදවුම්කරු ආනන්ද පාලිත පැවසුවේ මේ හේතුවෙන් භූමිතෙල් සහ කර්මාන්ත ශාලා සදහා අවශ්‍ය දැවි තෙල් සැපයීම ඇණහිටින බවයි.
සපුගස්කන්ද තෙල් පිරිපහදුව මගින් ඉන්ධන මෙටි්‍රක් ටොන් 4,600 ක් දෛනිකව පිරිපහදු කෙරෙන බවයි මෙහිදී ප්‍රකාශ කෙරුණේ. පවතින තත්ත්වය හේතුවෙන් එම ඉන්ධන ප්‍රමාණය වෙනුවට පිරිපහදු කළ ඉන්ධන වැඩි මිලකට ආනයනය කිරීම හේවෙන් මෙරට ඩොලර් අර්බුදය තවත් උග්‍ර වන බවත් ආනන්ද පාලිත වැඩිදුරටත් පෙන්වා දුන්නේය .
මේ අතර හිගයකින් තොරව ඉන්ධන ලබාදීම සදහා ඉන්ධන තොග පවතින බව ඛනිජ තෙල් තොග ගබඩා පර්යන්තයේ සභාපති මොහොමඩ් උවයිස් මොහොමඩ් මාධ්‍ය වෙත පැවසීය . ඩීසල් තොග දින 10 ත් 12 ත් අතර කාලයකට ප්‍රමාණවත් පරිදි සහ පෙට්්‍රල් තොග දින 18 ත් 20 ත් අතර කාලයකට ප්‍රමාණවත් පරිදි රට තුළ පවතින බවයි ඔහු වැඩිදුරටත් සදහන් කළේය .
