මෙරට විශ්වවිද්‍යාල සඳහා බඳවා ගන්නා සිසුන් ප්‍රමාණය 25% කින් වැඩි කිරීමට රජය තීරණය කර ඇත.
ඒ අනුව මෙවර සිසුන් කණ්ඩායම් දෙකක් එකවර බඳවා ගැනීමට ඇති හැකියාව සම්බන්ධයෙන් ද සොයා බලමින් සිටින බව උසස් අධ්‍යාපන අමාත්‍ය බන්දුල ගුණවර්ධන මහතා මාධ්‍ය වෙත පැවසීය.
විශ්වවිද්‍යාල පාලනාධිකාරිය සමග මේ දිනවල මේ පිළිබඳව සාකච්ඡා පවත්වමින් සිටින බවත්, ඒ සඳහා කඩිනමින් වැඩපිළිවෙළක් සකස් කිරීමට බලාපොරොත්තු වන බවත් බන්දුල ගුණවර්ධන මහතා මෙහිදී පැවසීය.
පසුගිය 2018 වසරේ උසස් පෙළ විභාගයට මුහුණ දුන් සිසුන් ද තවමත් විශ්වවිද්‍යාල සඳහා ඇතුළත්ව නොමැති අතර ඒ අනුව උසස් පෙළ සමත් වූවන් කණ්ඩායම් දෙකක් මේ වනවිට විශ්වවිද්‍යාල ප්‍රවේශය බලාපොරොත්තුවෙන් සිටීන බවද අමාත්‍යවරයා පැවසීය.
