රජයේ ඉහළ නිලධාරීන් කණ්ඩායමක් විසින් නීතිඥයන් කැඳවා සිරස රූපවාහිනී නාලිකාවේ විකාශන බලපත්‍රය අත්හිටුවීමේ නීතිමය තත්ත්වයන් විමසා බලමින් සිටින බවට තමාට දැනගන්නට ලැබී ඇතැයි විපක්ෂ නායක සජිත් ප්‍රේමදාස මහතා අද (7) පාර්ලිමේන්තුවේදී පැවැසීය.
මෙය ගෙතූ කතාවක් නොවන අතර මෙය තමා වගකීමෙන් කරන ප්‍රකාශයක් බව ද විපක්ෂ නායකවරයා එහිදී අවධාරණය කළේය.
සිරස නාලිකාවේ විකාශන බලපත්‍රය අහෝසි නොකරන බවට පාර්ලිමේන්තුවේදී ප්‍රකාශයක් කරන්නැයි විපක්ෂනායකවරයා මෙහිදී ආණ්ඩු පක්ෂයෙන් ඉල්ලා සිටියේය.
විපක්ෂ නායකවරයාගේ ප්‍රකාශයෙන් පසු විපක්‍ෂයේ මන්ත්‍රීවරුන් පාර්ලිමේන්තුව තුළ කෑකෝ ගසමින් සභා ගැබ මැදට පැමිණ විරෝධතාවයට සැරසෙන්නට වූහ.
මෙම ප්රකාශයට ප‍්‍රතිචාර දක්වමින් අමාත්‍ය බන්දුල ගුණවර්ධන මහතා කියා සිටියේ එවැනි කිසිදු ක්‍රියාමාර්ගයක් මේ මොහොතේ සිදුනොවන බවත් කිසිදු මාධ්‍ය ආයතනයට එරෙහිව මර්දනකාරී ක්‍රියාවක් වත්මන් රජය සිදු නොකරන බව ය.
