දෙහිවල ගල්කිස්ස මහනගර සභාවේ ශ්‍රී ලංකා පොදුජන පෙරමුණේ හිටපු මන්ත්‍රී රන්ජන් ද සිල්වා මහතාට වෙඩිතබා ඝාතනය කොට ඔහුගේ පුත් ක්‍රිකට් ක්‍රීඩක ධනංජය සිල්වා ඝාතනයට තැත් කළ රත්මලානේ ‘කුඩු අංජුගේ’ ගෝලයෙක් ටී56 ගිනි අවි රැගෙන නිදහසේ සැරිසරමින් විරුද්ධවාදීන් ඝාතනයට උත්සාහ දරමින් සිටියි.
කුඩු අංජු නමැත්තා ඩුබායිහි සිට ලබාදෙන උපදෙස්වලට අනුව ගෝලයින් පසුගිය 18 වැනිදා අත්තිඩියේ ගොවිපොලවත්ත ප්‍රදේශයේ මහ දවාලේ පුද්ගලයකු ඝාතනය කරන්නට ගොස් තිබුණේ ටී56 අතැතිවය. ඔවුන් එසේ ගමන් කරන අයුරු සීසීටීවී කැමරාවට හසුව තිබුණි.
පසුගිය 22 වැනිදා නැවතත් ඔවුන් මොරටුවේ තට්ටු නිවාස සංකීරණයකට කඩාවැදී උත්සාහ කර ඇත්තේ ටී56 ද රැගෙනයි. මේ අයුරින් මොවුන් ටී56 ආයුධ රැගෙන ගෙවී ගිය සතිය තුල ස්ථාන 6-7කට පමණ ගොස් ඇති බවත් මේ කල්ලියට පොලීසියේ ඇතැම් අයගේ සහය ලැබෙන බවත් බුද්ධි අංශ පවසයි.
ඉකුත් 2 වැනිදා රත්මලාන බොරුවලදී මහේෂ් නමැත්තාට කපා කොටා මරා දමා තිබුණේ ද මේ කල්ලිය විසිනි.
මහේෂ්ගේ අවසන් කටයුතු තොරණ් ගසා ඉහළින් ගන්නට එපා යැයි ඔහුගේ සොයුරාට ඩුබායිහි සිට අංජු විසින් තර්ජනය කර තිබුණි.
