ගැටලු 06ක් මුල්කර ගනිමින් මේ මස 19 වැනිදායින් පසු ඕනෑම මොහොතක වැඩවර්ජනයක් සිදුකිරීමට තීරණය කර තිබෙන බව රජයේ වෛද්‍ය නිලධාරීන්ගේ සංගමය පවසයි.
අදාළ ගැටලු විසඳීමට බලධාරීන්ට ලබාදුන් කාලය අවසන් බවත්, ගැටලු විසඳීමට බලධාරීන් උනන්දු නොවන නිසා අද (15දා) පැවැති මධ්‍යම කාරක සභා රැස්වීමේදී මෙම තීරණය ගත් බවත් එම සංගමයේ ලේකම් වෛද්‍ය හරිත අලුත්ගේ මහතා සඳහන් කළේය.
එසේම වෛද්‍ය අධ්‍යාපනයේ අවම සුදුසුකම නීතිගත නොකිරීම බාල ඖෂධ ලබාදීම නවතා දැමීමට කටයුතු නොකිරීම හා ඖෂධ හිඟයට විසඳුම් ලබා නොදීම ඇතුළු ගැටලු මුල්කර ගනිමින් මෙම වැඩවර්ජනය සිදුකරන බවද වෛද්‍ය හරිත අලුත්ගේ මහතා අද (15දා) පැවැති මාධ්‍ය සාකච්ඡාවකදී වැඩිදුරටත් පැවසීය.
