ප්‍රේමයත් ඉන් වෙන්වීමත් අතර මනුෂ්‍ය චිත්ත සන්තානයෙහි පවතිනුයේ ද්වි ධ්‍රැවීකරණීයවූ දුරස්ත හැගුම් සමුදායකි. වචනයේ පරිසමාප්තාර්ථයෙන්ම ප්‍රේමයෙන් වෙළී සිටිනා යුවලක් ඔවුනොවුන් සලකනුයේ ඔවුන් දෙදෙනකු ලෙස නොව ආදරණීය එක් පොදු ශරීරයක් ලෙසටය. එසේ දෙදෙනකු ප්‍රේමයේ මහිමයෙන් පොදු වස්තුවක් වීම නම් නාම මාත්‍රය රදාපවතිනුයේ එකිනෙකා කෙරෙහි වූ විශ්වාසය හා ගෞරවය සියුම්ලෙස ආදරය නම් සිනිදු හුයෙන් එකිනෙකා ගැටගැසීමෙනි. මෙම සංකල්පයෙහි පවතින සුවිශේෂීත්වය වන්නේ ඉහත කී ගෞරවය හෝ ආදරය එකිනෙකා කෙරෙන් ගිළිහෙන්නට ගත් මොහොතේ පටන් ඔවුන් ගැට ගැසී තිබෙන ආදරය නම් සිනිදු හුය ක්‍රමයෙන් ලිහිල් වීමට පටන් ගැනීමය. මෙකී අතිශය සංවේදී වූත් කම්පිත් වූත් සංකල්පය පසුගියදා අන්තර්ජාලයට එක් වූ එක් අපූරු ගීතයකින් අසන්නට දකින්නට ලැබුණි. එනම් ලසන්ත ආරියරත්න විසින් රචිත තරුණ සංගීතවේදියෙකු වූ අරුණ ගුණවර්ධනගේ සංගීතයෙන් හැඩවී ලක්ෂණා ලක්මිණිගේ හඩින් වර්ණවත් වූ ‘ප්‍රේමයේ සුන් බුන්’ ගීතයයි.
සංගීතය – අරුණ ගුණවර්ධන
ගග දනීනම් නිම්නයේ මැද ගල් කුලක ගැරහුම්
සද දනී නම් ගනදුරම ගැන තරු මිතුරු විමසුම්
විල දනී නම් කලල් අතරේ මියෙන වග පියුමන්
නුඹ දනී නම් හමුවෙනා මතු ප්‍රේමයේ සුන්බුන්
ප්‍රේමය තුල විවිධ ගැටලු කෙමෙන් වැඩෙන විට එතෙක් ප්‍රේමයෙන් පිරී තුබූ ඔවුනොවුන්ගේ සිත් කියා ගත නොහී ශෝකයක් විසින් වෙළා ගනීමෙන් ආතුර වීම මානව හැසිරීමිහි සාමාන්‍යය තත්වයයි. එහි ප්‍රතිථලක් වශයෙන් නිර්මාණය කරනු ලබන මිනිසා ප්‍රේමය තුල මටසිළුටු තැනැත්තකු වුවද ආදරයේ රැහැන ලිහිල්වූ තැන යළි ඉපැදෙන්නේ රළු වූ ඇතැම්විට රාක්ෂයෙකි. මෙම ගීතයේ පද රචකයා එකී කතාව පෙළ ගැස්වීම සදහා ගීතයට ලබා දෙන ආරම්භය ප්‍රබල චිත්තරූප මවන්නකි. ඒ අනුව මෙකී ශෝකීය අත්දැකීම මෙතෙක් අත්විද නැත්තෙකු හට වුව මෙම ගීතය ආරම්භයේ සිට සුන්බුන් වෙමින් යන ප්‍රේමයක් තුල සිරවූ ස්ත්‍රියකගේ හෝ පුර්ෂයකුගේ කටුක සිත අත්විදීමට කදිම රූපක වපසරියක් සකසා දෙයි. ඒ සදහා රචකයා යොදාගන්නා බස මනරම්ය.
ගායනය -ලක්ෂණා ලක්මිණි
ප්‍රේමය ගිළිහී එතුල රාක්ෂයා අවදිවන්නාවූ ඒ අවාසනාවන්ත මොහොත රචකයා සිය පද වැල තුල නිර්මාණය කරනුයේ හද කම්පිත කරවමිනි. එතෙක් නුරාවෙන් වැහිරුනු දෙතොල් මත රක්ත වර්ණැති රිධිරය ආලේප වනවිට, එතෙක් ඔවුන් විදි ආදරය ප්‍රේමානුරාගයේ පිහිනූ සයනයේදීම ඔවුන්ගේ ප්‍රේමයේ ගෙළ සිදී යන කල කදුලින් පමණක් එකී දුක කියා නිම කළ හැකිද. ඔහු ඒ සදහා යොදා ගනු ලබන භාෂාව මෙන්ම උපමා හා රූපකද අතිශය ප්‍රබලය. කොටින්ම එහි අරුත හී සැරයක් මෙන් ශ්‍රාවකයාගේ හද කකියවන්නට සමර්ථය. ඒ සදහා ඔහුගේ පදපෙලෙහි දෙවැනි අර්ධය සාක්ෂ්‍ය සපයයි.
මුව මී සෙවූ ලවනත උලා රත හැඩ කළේ රුහිරෙන්
විල් සයනයේ පිහිනූ හසුන් ගෙළ සිදලුයේ සැතකින්
සියලු කුණාටු හමා අවසන් වූ කල ප්‍රේමයේ සුන්බුන් අතර එකිනෙකාට වෛර කරමින් දෙස්දෙවොල් තබමින් එකට ජීවත් වනවාට වඩා අතහැරීම සුදුසු බව රචකයා හගවයි. ඒ බැවු රචකයා සිය පද වැළෙහි අවසන් පදය වශයෙන් මෙලෙස රචනා කොට තිබේ.
‘තබා රොන් සුණු ඔබේ පාමුල නටුව හැර යමි මං’
ගීතය පුරාවට ක්‍රමිකව ගොඩ නැගෙන ප්‍රේමයේ උත්කර්ෂයෙන් ඉක්බිති ගොඩ නැගෙන කම්පනය තව
දුරටත් තීව්‍ර නොකරමින් සිය වෘතාන්තය ශෝකාන්තිකව වුවද යම් උපේක්ෂාසහගත අන්තයකින් අවසානයක් කරා යොමු කිරීමට ඔහු සමත් වී තිබේ. ඔහු ඒකී සංසිද්ධිය ගීතය තුල වාචිත්‍රණය කරන අයුරු අපූරුය.
පද රචනය -ලසන්ත ආරියරත්න
මෙම ගීතය පුරාවට රචකයාගේ භාෂා පරිචය මෙන්ම සාහිත්‍යය නම් අපූරු මෙවලම මගින් කිසිදු හානියක් කෘතිය හට නොකරමින් වඩාත් සියුම් ලෙස සිය ගීතයේ අරමුණ කරා මෙහෙයවීමට ඔහු කෙතරම් සමතෙක් දැයි විදහා දක්වයි. එසේම පද වැල තුලින් ගම්‍ය වන අරුත කෙතරම් ගැඹුරක් කරා ගමන් ගන්නේද යන්න පද පෙල කිහිපවරක් කියවීමෙන් පසක් කොට ගත හැකිය. එනයින් ‘ප්‍රේමයේ සුන්බුන්’ ගීතය සදහා ලසන්ත විසින් ගොතන ලද පද වැල ලාංකීය සුභාවිත ගීතයේ නව මානයක් සලකුණු කරන්නක් වශයෙන් හදුනා ගැනීම නිවැරදිය.
ගීතයේ පදවැල විසින් ශ්‍රාවකයාව රැගෙනයන ශෝකාන්විත ගීතමය සංචාරය වඩාත් තීවෘ කොට චිත්‍රණය කිරීමේදී අරුණ ගුණාවර්ධනගේ සංගීත සංයෝජනය දක්වා තිබෙන අතිශය සෞන්දර්යාත්මක දායකත්වය මෙහිදී ඉස්මතුකළ යුතුය. අරුණගේ සුපුරුදු නැවුම් සංගීතය මෙම ගීතය තුලින්ද වඩාත් අර්ථාන්විත අයුරුන් ඉදිරිපත් කොට ඇති අතර ඔහු මෙම ගීතය තුල යොදාගෙන තිබෙන සිතාර හා බටනලා ඛණ්ඩ මගින් ගී පද වැලෙන් රචකයා ඉදිරිපත් කොට ඇති ක්‍රමිකව ගොඩ නැගී උත්කර්ෂයට ගොස් නැසී යන ප්‍රේමය වඩාත් තීවෘ කරවන බැව් පෙන්වා දිය යුතුය. විශේෂයෙන්ම ගීතයේ මධ්‍යය කොටසට එළඹෙන විට අරුණ යොදා ගන්නා බටනලා ඛණ්ඩය මගින් පදවැල විසින් ශ්‍රාවකයා හට ඉගි කරන ප්‍රේමයේ ක්‍රමික විනාශයේ ප්‍රතිථලය කුදු සුන්බුන් ගොඩක් මිස අන් කවරක්දැයි අගවන්නක් මෙන් ශ්‍රාවකයාගේ සිත මහා පාළුවකින් වෙළාදැමීමට සමර්ථය. තවදුරටත් එකී බටනලා ඛණ්ඩය විසින් සමස්ත ගීතය තුල සෞන්දර්යාත්මක සන්ධිස්ථානයක් සලකුණු කිරීමට සමත් බවද මෙහිදී පෙන්වා දිය යුතුය. එසේම යොවුන් ගායන ශිල්පිණියක් වන ලක්ෂණා ලක්මිණිගේ හඩ පරාසය මගින් මෙම ගීතයට ඇය උපරිම සාධාරණයක් ඉටු කිරීමට උත්සහ කොට ඇතිබවද පෙන්වා දිය හැකිය.
මෙම ගීතය පදවැල, සංගීතය හා හඩ නම් තුන්තරා සම්මාදම මැනවින් සංයෝජනය වූ අර්ථවත් හා සුවිසල් සෞන්දර්යක් කැටිවූ අපූරු නිර්මාණයක් වශයෙන් හදුනා ගැනීම වඩාත් යෝග්‍යය. එනයින් කුදු වාණිජ්‍යය අරමුණු වලින් තොරව ලාංකීය සුභාවිත සංගීතයේ ප්‍රගමනය සදහාම පමණක් ඉද හිට කරලියට පැමිණෙන මෙවන් අර්ථවත් නිර්මාණ අන්තර්ජාලය නම් වූ මහා විශ්වයේ ගණදුරේම මියයාමට ඉඩ නොදී ලාංකීය මිනිසුන්ගේ දෙසවන් වෙත වඩ වඩාත් ළගා කරවීම නම්වූ සමාජයීය ප්‍රවනතා ශක්තිමත් කිරීම සදහා යෝජනා සමාජය තුලින්ම රෝපණය විය යුතුය. එනයින් ප්‍රේමයේ සුන්බුන් නම් මෙම සෞන්දර්යාත්මක නිර්මාණය අවසන් වශයෙන් හදුනා ගත් හැක්කේ වත්මන ශීග්‍රයෙන් සුන්බුන් බවට පත්වෙමින් යන ලාංකීය සුභාවිත සංගීතකෙත රැක ගැනීම සදහා ඉද හිට අහසින් ඇදහැලෙන සුපිරිසිදු වැසිජලය ලෙසය.
ප්‍රේමයේ සුන්බුන්
ගග දනීනම් නිම්නයේ මැද ගල් කුලක ගැරහුම්
සද දනී නම් ගනදුරම ගැන තරු මිතුරු විමසුම්
විල දනී නම් කලල් අතරේ මියෙන වග පියුමන්
නුඹ දනී නම් හමුවෙනා මතු ප්‍රේමයේ සුන්බුන්
මුව මී සෙවූ ලවනත උලා රත හැඩ කළේ රුහිරෙන්
විල් සයනයේ පිහිනූ හසුන් ගෙළ සිදලුයේ සැතකින්
පළදා සිනා පෙන්වූ බැදුණු අත් දැන් ලිහී අවසන්
තබා රොන්සුණු නුඹේ පාමුල නටුව හැරයමි මං
නීතීඥ තිලංග ෆොන්සේකා
ගීතයේ යූනාල යොමුව පහතින්
