ඇමෙරිකානු ජනාධිපති ඩොනල්ඩ් ට්‍රම්ප් විසින් ඉකුත් ජනවාරි මස 20 වන දින අත්සන් තබන ලද විධායක නියෝගයකට අනුව ඇමෙරිකා එක්සත් ජනපදය විසින් අරමුදල් සපයන විදෙස් ව්‍යාපෘති දින 90ක කාලයක් සඳහා අත්හිටුවන ලෙස නියෝග කෙරිණි.
එම නියෝගයට අනුව ජාත්‍යන්තර සංවර්ධනය සඳහා ඇමෙරිකා එක්සත් ජනපද නියෝජිතායතනය (USAID) විසින් ශ්‍රී ලංකාව තුළ ක්‍රියාත්මක කරනු ලබන ව්‍යාපෘති රැසක් අත්හිටුවා තිබේ.
ජාත්‍යන්තර සංවර්ධනය සඳහා ඇමෙරිකා එක්සත් ජනපද නියෝජිතායතනය හෙවත් USAID විසින් පවත්වාගෙන යනු ලබන නිල වෙබ් අඩවිය ඇතුළු සමාජ මාධ්‍ය ගිණුම් රැසක් ද මේ වන විට අක්‍රීය කර තිබේ.
USAID යනු කුමක් ද?
පළමු සහ දෙවන ලෝක යුද්ධවලින් විනාශයට පත්වූ යුරෝපය ඇතුළු රටවල් නගා සිටුවීම සඳහා ඇමෙරිකාව ආධාර ලබා දුන්නේ ය.
කෙසේ වුව ද, සමාජ හා ආර්ථික සංවර්ධනය ප්‍රවර්ධනය කිරීම සඳහා විදේශ රටවල් වෙනුවෙන් ආධාර ලබාදීම සහ ඒවා පරිපාලනය කිරීමේ වගකීම තනි ආයතනයකට පැවරීම සඳහා එවකට ඇමෙරිකාවේ ජනාධිපතිවරයාව සිටි ජෝන් එෆ්. කෙනඩි විසින් අත්සන් තබන ලද විධායක නියෝගයකට අනුව 1961 නොවැම්බර් 3 වන දින USAID හෙවත් ජාත්‍යන්තර සංවර්ධනය සඳහා ඇමෙරිකා එක්සත් ජනපද නියෝජිතායතනය පිහිටවනු ලැබිණි.
ඒ හරහා ලොව පුරා ක්‍රියාත්මක වන රාජ්‍ය නොවන සංවිධාන, ආධාර කණ්ඩායම් සහ ලාභ නොලබන ආයතන සඳහා මූල්‍යාධාර බෙදා දීම සිදුකරයි.
ඊට අමතරව, යුද්ධ කලාපවල මානුෂීය ප්‍රයත්නයන් සහ එන්නත් වැඩසටහන් ඇතුළු ක්‍රියාකාරකම් රාශියකට අරමුදල් සපයන USAID වැඩසටහනට සම්බන්ධව රටවල් 60කට වැඩි ගණනක පුද්ගලයන් 10,000ක් පමණ සේවය කරති.
ශ්‍රී ලංකාව තුළ USAID ව්‍යාපෘති ආරම්භය
1961 වසරේ සිට සෞඛ්‍ය, අධ්‍යාපනය සහ තාක්ෂණික පුහුණුව, කෘෂිකාර්මික සහ ජීවනෝපාය සංවර්ධනය, පරිසරය සහ ස්වභාවික සම්පත් කළමනාකරණය, පළාත් පාලනය, මානුෂීය ආධාර සහ පශ්චාත් යුද සමයේ සංක්‍රාන්තික යුක්තිය වැනි ක්ෂේත්‍රවල ඇමෙරිකාවේ සහය දක්වන වැඩසටහන් ශ්‍රී ලංකාව තුළ ක්‍රියාත්මක විය.
ජාත්‍යන්තර සංවර්ධනය සඳහා ඇමෙරිකා එක්සත් ජනපද නියෝජිතායතනයේ (USAID) ශ්‍රී ලංකා ෆේස්බුක් පිටුවේ දක්වා ඇති ආකාරයට එම වැඩසටහන විසින් මේ වන විට ශ්‍රී ලංකාවේ ක්‍රියාත්මක කෙරෙන එහි ව්‍යාපෘති වෙනුවෙන් රුපියල් බිලියන 350ක් (දළ වශයෙන් ඇමෙරිකානු ඩොලර් බිලියන 2ක්) පිරිනමා තිබේ.
ජාත්‍යන්තර සංවර්ධනය සඳහා ඇමෙරිකා එක්සත් ජනපද නියෝජිතායතනය මෙරට රජයේ මෙන් ම රාජ්‍ය නොවන සංවිධානවල ව්‍යාපෘති වෙනුවෙන් මූල්‍ය ආධාර සැපයීම සිදු කළේ ය.https://flo.uri.sh/visualisation/21465191/embed?auto=1
‘අකමැත්තෙන් වුණත් සමුදෙන්න සිද්ධ වුණා’
මෙරට සංක්‍රාන්තික ප්‍රජාව වෙනුවෙන් කටයුතු කරන සංක්‍රාන්ති පදනමේ සභාපතිනි භුමි හරේන්ද්‍රන් බීබීසී සිංහල සේවය වෙත අදහස් දක්වමින් පැවසුවේ, ජාත්‍යන්තර සංවර්ධනය සඳහා ඇමෙරිකා එක්සත් ජනපද නියෝජිතායතනය විසින් ආධාර අත්හිටුවීම හේතුවෙන් සිය ව්‍යාපෘතිවල කටයුතු කළ ඇතැම් පුද්ගලයින්ට අකමැත්තෙන් වුව ද සමුදීමට සිදුවූ බව ය.
”ඕනෑ ම වැඩක් කරන්න අරමුදල් අවශ්‍ය යි. මේ වෙලාවේ හැටියට ප්‍රජාවකට අපි සපයන් හිටපු සේවාවන් අඩාළ වෙලා තියෙනවා. අපිත් එක්ක වැඩ කරපු සමහර අයට අකමැත්තෙන් වුණත් සමුදෙන්න සිදුවෙලා තියෙනවා මේ ඇති වෙලා තියෙන තත්ත්වය එක්ක.”
”අපි ලංකාවේ සංක්‍රාන්ති සමාජයේ සිටින පුද්ගලයින්ගේ ජීවන තත්ත්වය නගා සිටුවන්න ව්‍යාපෘති ගණනාවක් සිදුකරනවා. මොක ද ඒ පුද්ගලයින් වෙනුවෙන් සමාජයේ වෙන කොහෙන්වත් කිසිම වැඩපිළිවළක් ක්‍රියාත්මක වෙන්නේ නැහැ.
සංක්‍රාන්තික සමාජයේ සිටින පිරිස් සඳහා දැනුම බෙදා දීම, පුර්ව සංක්‍රාන්තික පසුබිමේ ඉන්න අයට අවශ්‍ය මග පෙන්වීම සහ සහයෝගය වගේ ම වැඩිහිටි සංක්‍රාන්තිකයින්ට අවශ්‍ය උපකාර අපේ ආයතනය විසින් ලබා දෙන සේවාවන්වලට ඇතුළත්. අපි දීපව්‍යාප්තව මේ වැඩපිළිවෙළ ක්‍රියාවට නංවලා තිබුණා, ඒ වැඩකටයුතුවලට මේ ඇති වෙලා තියෙන තත්ත්වය එක්ක බාධාවක් එල්ල වෙලා තියෙනවා,” ඇය පැවසුවා ය.
‘විශාල පිරිසකගේ රැකියා අනතුරේ’
නීතිය සහ සමාජ භාරයේ වැඩසටහන් අධ්‍යක්ෂක සඳුන් තුඩුගල බීබීසී සිංහල සේවය වෙත පැවසුවේ, ජාත්‍යන්තර සංවර්ධනය සඳහා ඇමෙරිකා එක්සත් ජනපද නියෝජිතායතනය (USAID) විසින් මෙරට ක්‍රියාත්මක කරනු ලබන ව්‍යාපෘති සඳහා අරමුදල් අත්හිටුවීම නිසා එම ව්‍යාපෘතිවල සේවය කරන පුද්ගලයින්ගේ රැකියා පවා අවිනිශ්චිත මට්ටමකට පත්ව ඇති බව ය.
”මේ වෙන කොට ඇමෙරිකාව USAID එක විතරක් නෙමෙයි තවත් අංශ කිහිපයකින් ආධාර සැපයීම සිදුකරනවා විදේශ රටවල්වලට. ශ්‍රී ලංකාව වෙනුවෙන් USAID ආයතනය රාජ්‍ය අංශය වගේ ම පෞද්ගලික රාජ්‍ය නොවන සංවිධාන හරහාත් විවිධ ව්‍යාපෘති වෙනුවෙන් අරමුදල් සැපයීම සිදුකළා. නමුත් රාජ්‍ය නොවන සංවිධාන විශාල සංඛ්‍යාවක් හිටියා ඍජුව හෝ වක්‍ර විදිහට අරමුදල් අරන් සේවා සැපයීම සිදුකරනු ලැබුවා.”
”ඒ අතර මානව හිමිකම් වෙන්න පුළුවන්, ජීවනෝපයන් සංවර්ධනය කිරීම, ප්‍රජාතන්ත්‍රවාදය ඇතුළු විශාල වපසරියක් වෙනුවෙන් අරමුදල් සැපයීම සිදුකළා USAID ආයතනය.”
”ඉතින් මේ වෙලාවේ තියෙන තොරතුරු අනුව දින 90කට අරමුදල් ලබා දීම නතර කරලා තියෙන්නේ. අඩු ම තරමින් USAID එකේ ඔන්ලයින් පොර්ට්ල් එක පවා නතර කරලා තියෙන්නේ. මේ නිසා විශාල අවිනිශ්චිතභාවයක් තියෙන්නේ. විශේෂයෙන් ම මේ ව්‍යාපෘතිවල දහසකට අධික සංඛ්‍යාවක් රැකියාවල නිරත වුණා. ආරම්භ කරපු වැඩ කරපු ව්‍යපෘති ගණනාවක් තියෙනවා ප්‍රජාවන් එක්ක සෘජුව සම්බන්ධ වෙලා. ඒවයේ වැඩ කරන අයට මොකක් වෙයි ද කියන එක ගැනවත් හරියට කියන්න බැහැ දැන් මේ තියෙන තත්ත්වය එක්ක. මේ නිසා ඒ ව්‍යපෘතිවලට වගේ ම රැකියාවලටත් සෘජුව ම බලපාන්න පුළුවන්.”
”නව ආණ්ඩුවක් බලයට පත්වීමත් එක්ක නව නීති සම්පාදනය කිරීම ඇතුළු කටයුතුවලදී රාජ්‍ය නොවන සංවිධානවලට ඒ හා සම්බන්ධව කටයුතු කරන්න දැන් හැකියාවක් නැහැ,” ඔහු පැවසුවේ ය.https://flo.uri.sh/visualisation/21465141/embed?auto=1
‘ග්‍රාමීය මට්ටමට විශාල බලපෑමක් එල්ල වේවි’
ඇමෙරිකාව විසින් විදේශ රටවලට ලබා දෙනු ලබන ආධාර අත්හිටුවීමත් සමග මෙරට ග්‍රාමීය මට්ටමේ ජනතාවට එයින් ඇති වන බලපෑම විශාල බව වයඹ විශ්වවිද්‍යාලයේ ආර්ථික විද්‍යා මහාචාර්ය අමින්ද මෙත්සිල පෙරේරා බීබීසී සිංහල සේවය වෙත අදහස් දක්වමින් පැවසුවේ ය.
”මේ පාරත් ඩොනල්ඩ් ට්‍රම්ප් ජනාධිපති ධූරයට පත්වීමත් එක්ක සිදුකරන සමාජීය සහ ආර්ථික පරිවර්තනයන් ගැන හැමෝගෙ ම අවධානය යොමු වෙලා තියෙනවා. විශේෂයෙන් රිපබ්ලිකන් අපේක්ෂකයෙක් ජනාධිපති වුණා ම තමන්ගේ රට පළමු කොට හිතනවා කියලා. ඒ නිසා කැනඩාව, චීනය, මෙක්සිකෝව වගේ රටවල්වලට තීරු බදු පැනවීම පවා සිදුකරලා තියෙනවා.”
”ඒ වගේ ම ඇමෙරිකාවේ නව ජනාධිපතිවරයා අනෙක් පැත්තෙන් කියනවා තමන්ගේ රටින් අනික් රටවලට කරපු ආධාරවල කපා හැරීමක් කරන්න කියලා. මේක තමයි තමන්ගේ රට ගැන හිතනකොට තමන්ගේ රටින් පිටට යන ඩොලර් ප්‍රමාණය අඩු කරන්න ගන්නා උපාය මාර්ග.”
”අවසානයේදී ලංකාව වගේ රටකට ඒක බලපාන ආකාරය ගැන බැලුවොත්, පවතින ආර්ථික අර්බුදයත් එක්ක අපි විශාල වශයෙන් විදේශ රටවල්වලින් ආධාර උපකාර බලාපොරොත්තු වුණා. USAID වැනි ආයතන හරහා ඇමෙරිකාව ලංකාවට විශාල වශයෙන් විවිධ ව්‍යාපෘති වෙනුවෙන් ආධාර ලබා දීම සිදුකර තියෙනවා. ඒ හරහා යුද්ධයෙන් පස්සේ සිදුකරපු සංවර්ධන ක්‍රියාවලීන්, ග්‍රාමීය ජනතාවගේ ජීවනෝපාය නගා සිටුවීම වගේ වැඩකටයුතු රැසක් මේ හරහා සිද්ධ වුණා.”
”ඒ වගේ ම රාජ්‍ය නිලධාරීන් පුහුණු කිරීම සහ රාජ්‍ය අංශය හා සම්බන්ධ ව්‍යපෘතිවලටත් ඇමෙරිකාවෙන් ආධාර ලැබුණා, USAID ඇතුළු විවිධ ආයතන හරහා. දැන් නව ජනාධිපතිවරයාගේ මේ තීරණයත් එක්ක ලංකාවට විශාල බලපෑමක් එල්ල කරන්න පුළුවන්. මේක ලංකාවට විතරක් නෙමෙයි ඇමෙරිකාව හරහා ආධාර ලබා ගත්ත රටවල් රැසකට මේ තත්ත්වය බලපානවා.”
”රාජ්‍ය නොවන සංවිධාන ගැන අපේ බහුතරයකට තිබ්බේ ඍණ ආකල්පයක්. නමුත් මේ සංවිධාන යුද්ධයෙන් පස්සේ ග්‍රාමීය මට්ටමෙන් සිදුකරපු දුප්පත්කම තුරන් කිරීමේ වැඩසටහන් වගේ ම ඔවුන්ගේ ජීවන තත්ත්වය නගා සිටුවන්න විශාල වැඩකොටසක් කළා. පවතින අලුත් තත්ත්වය එක්ක ඒ වැඩසටහන් නතර වෙන නිසා ඒකේ බලපෑම ලොකුවට දැනේවි,” මහාචාර්යවරයා පෙන්වා දුන්නේ ය.
ඇමෙරිකානු තානාපති කාර්යාලයෙන් ලද ප්‍රතිචාරය
ඇමෙරිකානු ආධාර යටතේ ශ්‍රී ලංකාවේ ක්‍රියාත්මක කර ඇති USAID ව්‍යාපෘති සම්බන්ධයෙන් දැනට මතුවී ඇති ගැටලුසහගත තත්ත්වය සම්බන්ධයෙන් බීබීසී සිංහල සේවය මෙරට ඇමෙරිකානු තානාපති කාර්යාලයට ප්‍රශ්න කිහිපයක් යොමු කළේ ය.
දැනට මෙරට පිහිටි USAID ව්‍යාපෘතිවල කොපමණ පිරිසක් රාජකාරී සිදුකරන්නේ ද? දැනට ක්‍රියාත්මක වන ව්‍යාපෘති ගණන කොපමණ ද?, දැනට ක්‍රියාත්මක කර ඇති ව්‍යාපෘති සංඛ්‍යාව සම්පූර්ණයෙන් අත්හිටුවනවා ද? සහ එම ව්‍යාපෘති නැවත ක්‍රියාත්මක කිරීමට අවස්ථාවක් තිබෙනවා ද? යනු එම ප්‍රශ්න වේ.
ඊට ප්‍රතිචාර දක්වමින් ශ්‍රී ලංකාවේ පිහිටි ඇමෙරිකානු තානාපති කාර්යාලයේ මාධ්‍ය ප්‍රකාශකවරයා දැනුම් දුන්නේ, අප විසින් නගන ලද ප්‍රශ්න ඔවුන් වොෂින්ටනය වෙත යොමු කර ඇති බවත් ඊට අදාළව පිළිතුරු ඔවුන්ගෙන් අපේක්ෂා කරන බවත් ය.
USAID පිළිබඳ ඇති මතභේදය කුමක්ද?
ඇමෙරිකා එක්සත් ජනපද රජයේ ප්‍රධාන විදේශ ආධාර ඒජන්සියේ අනාගතය පිළිබඳව ඇතිවී තිබෙන අවිනිශ්චිතතාවය ලොව පුරා කම්පනයක් ඇති කර තිබේ. ඇමෙරිකා එක්සත් ජනපද ජනාධිපති ඩොනල්ඩ් ට්‍රම්ප් සහ ඔහුගේ ඉහළ උපදේශක ඊලොන් මස්ක් විසින් විදේශ ආධාර ඒජන්සිය දැඩි ලෙස විවේචනය කර ඇති අතර අනෙක් පිරිස් එය වසා දැමීම බොහෝ හානිකර බලපෑම් ඇති කරනු ඇතැයි බිය පළකර සිටිති. නමුත් මේ සියල්ල මෙතරම් මතභේදාත්මක වන්නේ ඇයි ද සහ මෙමගින් අවදානමට ලක්ව ඇත්තේ කුමක්ද?
නමුත් සති අන්තයේ මස්ක් පැවසුවේ පරිපාලනය එය වසා දැමීමට සැලසුම් කර ඇති බවයි.
තමන් සතු සමාජ ජාලය වන X ඔස්සේ ඇමෙරිකානු විදේශ ආධාර ඒජන්සිය “දුෂ්ට”, “අපරාධ සංවිධානයක්” සහ “රැඩිකල්-වාම දේශපාලන මනෝමූල වැඩසටහනක්” ලෙස මස්ක් හැඳින්විය.
ඒජන්සිය “රැඩිකල් වාම උන්මත්තකයින්” විසින් පවත්වාගෙන යන බවත් “දැවැන්ත වංචාවකින්” ගැලවෙන බවට ජනාධිපති ට්‍රම්ප් චෝදනා කළ නමුත් ඔහු නම් හෝ වෙනත් විස්තර කිසිවක් ලබා නොදුනි.
මෙම ගැටළුව ඇමෙරිකා එක්සත් ජනපදයේ දේශපාලන ගැටුමක් ඇති කර ඇති අතර බොහෝ හේතු නිසා ලොව පුරා පුළුල් විවාදයක් ඇති කර තිබේ.
USAID දේශපාලනික වශයෙන් මතභේදාත්මක වන්නේ ඇයි?
විදේශ වියදම් ඔහුගේ “ඇමරිකාව පළමුව” ප්‍රවේශය සමඟ සමීපව පෙලගැස්වීමට අවශ්‍ය බව ජනාධිපති ට්‍රම්ප් පැහැදිලි කර ඇත.
එමෙන්ම ඔහුගේ රාජ්‍ය ලේකම් මාර්කෝ රුබියෝ පවසා ඇත්තේ “සෑම ඩොලරයක්ම” ඇමෙරිකා එක්සත් ජනපදය වඩාත් ආරක්ෂිත, ශක්තිමත් සහ සමෘද්ධිමත් කරන බවට සාක්ෂි මගින් “සාධාරණීකරණය” කළ යුතු බවයි.
එබැවින් “ෆෙඩරල් නියෝජිතායතනවලට යටවීම” යන්නෙන් අදහස් වන්නේ ඔහු තම වචනයට “සැබෑව සිටීම” බව ඇමෙරිකා එක්සත් ජනපද දේශපාලනය පිළිබඳ UCL මධ්‍යස්ථානයේ ආරම්භක අධ්‍යක්ෂ තෝමස් ගිෆ්ට් පවසයි.
ඇමෙරිකාව නැවතත් ශ්‍රේෂ්ඨත්වයට පත්කරමු යන පක්ෂපාතීන්, USAID සලකන්නේ “ක්‍රියාවලියේදී බදු ගෙවන්නන්ගේ ඩොලර් නාස්ති කරන අතරම ඇමරිකාවට සහ සංවර්ධනය වෙමින් පවතින ලෝකයට මුල් තැන දෙමින්, ප්‍රගතිශීලිත්වයේ අවුල් සහගත වර්ධනයක්” ලෙස බව ඔහු සඳහන් කළේය.
“එය ට්‍රම්ප් ඔහුගේ පරිපාලනය අනුගමනය කරන දෙයට විරුද්ධ දෙයකි – අන් සියල්ලටම වඩා ඇමෙරිකා එක්සත් ජනපද පුරවැසියන්ගේ අවශ්‍යතාවලට ප්‍රමුඛත්වය දීම,” ආචාර්ය ගිෆ්ට් පැහැදිලි කරයි.
ඔහු පවසන්නේ USAID වසා දැමීම “ජනප්‍රියවාදී ජාතිකවාදීන්ගේ විශිෂ්ට ජයග්‍රහණයක්” වනු ඇති බවයි.
මත විමසුම් දිගු කලක් තිස්සේ යෝජනා කර ඇත්තේ ඇමරිකානු ඡන්දදායකයින් විදේශ ආධාර වියදම් කපා හැරීමට කැමැත්තක් දක්වන බැවින් ඒජන්සිය අහෝසි කිරීම මහජන සහයෝගය භුක්ති විඳිය හැකි බවයි.
නමුත් නැගෙනහිර ඇන්ග්ලියා විශ්ව විද්‍යාලයේ සංවර්ධන ආර්ථික විද්‍යාව පිළිබඳ සහකාර මහාචාර්ය ආචාර්ය පෝල් ක්ලිස්ට් පවසන්නේ විදේශ ආධාර සඳහා රජයන් කොපමණ මුදලක් වැය කරනවාද යන්න සාමාන්‍යයෙන් මිනිසුන් “දැවැන්ත ලෙස” අධිතක්සේරු කරන බවයි.
රජයේ වාර්තාවකට අනුව USAID සතුව ඩොලර් බිලියන 40 කට ආසන්න අයවැයක් ඇත, එහි සමස්ත විදේශ ආධාර වියදම් වලින් අඩකට වඩා වැඩිය. 2022 දී එක්සත් ජනපදය ඩොලර් බිලියන 70.3 ක් පමණ වෙන් කළ අතර එය මුළු ෆෙඩරල් අයවැයෙන් විදේශ ආධාර සඳහා 1% ක් පමණ විය.
සමස්තයක් වශයෙන්, ඇමෙරිකා එක්සත් ජනපද භාණ්ඩාගාරයට අනුව, වඩාත්ම මෑත මූල්‍ය වර්ෂය තුළ (ඔක්තෝබර් 2023 සිට සැප්තැම්බර් 2024 දක්වා) එක්සත් ජනපද ෆෙඩරල් රජය ඩොලර් ට්‍රිලියන 6.75 වියදම් කර ඇත.
විදේශ ආධාර හදිසියේ නතර කළහොත්, තවමත් අවසන් කිරීමට ඇති ව්‍යාපෘති සඳහා ආයෝජනය කර ඇති සියලුම මුදල් නාස්ති වන බව ආචාර්ය ක්ලිස්ට් පවසයි.
ඔහු පවසන්නේ සමහර ඇමරිකානු බදු ගෙවන්නන් විදේශ ආධාරවල සරල සහ තේරුම් ගැනීමට පහසු ප්‍රතිලාභ දැකීමට අරගල කළ හැකි නමුත් මෙම සහාය ලබා දීමෙන් මිනිසුන්ගේ ජීවිත බේරා ගැනීමට පමණක් නොව, එය ඇමෙරිකා එක්සත් ජනපදයට වැඩි බලපෑමක් සහ ආරක්ෂාවක් ලබා දීමටද උපකාරී වන බවයි.
මින් පසුව සිදුවන්නේ කුමක් ද?
USAID සම්පූර්ණයෙන්ම වසා දැමීම සඳහා කොන්ග්‍රස් මණ්ඩලයේ අනුමැතිය අවශ්‍ය වනු ඇත.
ට්‍රම්ප් පරිපාලනය විසින් සලකා බලනු ලබන එක් විකල්පයක් වන්නේ USAID රාජ්‍ය දෙපාර්තමේන්තුවේ ශාඛාවක් බවට පත් කිරීමයි.
ලේකම් රුබියෝ පවසා ඇත්තේ සංවිධානයේ බොහෝ කාර්යයන් දිගටම කරගෙන යනු ඇති බවත්, එය ඇමරිකානු විදේශ ප්‍රතිපත්තියේ කොටසක් වනු ඇති බවත්ය.
ඩිමොක්‍රටික් නීති සම්පාදකයින් නියෝජිතායතනය වසා දැමීම “නීති විරෝධී, ව්‍යවස්ථා විරෝධී” පියවරක් ලෙස නම් කර ඇති අතර එය විදේශයන්හි දුප්පත් මිනිසුන්ට රිදවන, ජාතික ආරක්ෂාවට හානි කරන සහ ඇමෙරිකා එක්සත් ජනපදයට ගෝලීය වේදිකාව සඳහා බලපෑම් කිරීමට ඇති හැකියාව අවම කරවනු ඇති බවයි.
අඟහරුවාදා, USAID නිවේදනය කළේ සිකුරාදා වන විට තම ගෝලීය කාර්ය මණ්ඩලයෙන් බහුතරයක් නිවාඩු යවනු ඇති බවත් විදේශ රටවල සිටින තම සේවකයින් නැවත ඇමෙරිකා එක්සත් ජනපදයට පැමිණෙනු ඇති අතර අත්‍යවශ්‍ය කාර්යයන්, නායකත්වය සහ විශේෂ වැඩසටහන් හසුරුවන ප්‍රධාන සේවකයින් පමණක් දිගටම රාජකාරී කරනු ඇති බවයි.
