පැතුම් වික්‍රමරත්න
ශ්‍රී ලංකාවේ නාය යෑම් අවම කිරීම වෙනුවෙන් පූර්ණ සහය ලබදීමට ඇමෙරිකාව ඉදිරිපත්ව සිටී .
මෙරට පිහිටි අමෙරිකා එක්සත් ජනපද තානාපති කාර්යාලය විශේෂ නිවේදනයක් නිකුත් කරමින් මේ බව අවධාරණය කර ඇත.
ඒ අනුව අමෙරිකා භූ විද්‍යා සමීක්ෂණ ආයතනයේ ඉංජිනේරුවන් සහ භූ විද්‍යාඥයින් පිරිසක් ඉකුත් නොවැම්බර් 5 වෙනි දා සිට 15 වැනි දා දක්වා මෙරටට පැමිණ නාය යෑම් පරීක්ෂණ උපකරණ මෙරට ස්ථාපනය කිරීමට ද කටයුතු කළ බව තානාපති කාර්යාලය පවසයි.
එමෙන්ම නාය යෑම් සිතියම්කරණයේ ගුණාත්මකභාවය වැඩි දියුණු කිරීම, ආපදා ප්‍රතිචාරයේදී විද්‍යාඥයින්ගේ කාර්ය භාරය ආදිය සම්බන්ධයෙන් ද අමෙරිකා භූ විද්‍යා සමීක්ෂණ ආයතනයේ නිලධාරීන් ජාතික ගොඩනැගිලි පර්යේෂණ සංවිධානයේ නිලධාරීන් දැනුවත් කර තිබේ.
තානාපති කාර්යාලයේ නිවේදනයේ දැක්වෙන්නේ, අමෙරිකාවේ විදේශ ආපදා කාර්යාලය ද මෙරට නාය යෑම් අපදා අවම කිරීම සම්බන්ධයෙන් දායකත්වය සපයා ඇති බවයි.
