නව කොරෝනා වසංගතය ව්‍යාප්තිය වැළැක්වීම සඳහා රට පුරා පනවා ඇති ඇඳිරි නීතිය නොතකා නීති උල්ලංඝනය කළ පුද්ගලයන් 790 දෙනෙකු පොලිස් අත්අඩංගුවට ගෙන තිබේ.
ත්‍රීරෝද රථ ඇතුළුව අනෙකුත් වාහන 154 ක් ද පොලිස් භාරයට ගෙන ඇත.
මින් වැඩි පිරිසක් අත්අඩංගුවට ගෙන ඇත්තේ මාර්ගයේ නිකරුණේ ගැවසීම සම්බන්ධවයි.
ඊට අමතරව ක්‍රීඩා පිටිවල පිරිසක් වශයෙන් එක්රැස්ව මත්පැන් පානය කිරීම වාහනවලින් මාර්ගයේ ගමන් කිරීම, බීමත්ව මාර්ගයේ අශෝභන ලෙස හැසිරීම වෙළදාම් කිරීම ආදී සිද්ධීන් සම්බන්ධයෙන් ද මොවුන් අත්අඩංගුවට ගෙන ඇත.
පොලිස් අත්අඩංගුවට ගන්නා ලද එම සැකකරුවන් සම්බන්ධයෙන් අවශ්‍ය නීතිමය පියවර ඒ ඒ පොලිස් ස්ථාන විසින් ගනු ලබන බව පොලිස් මූලස්ථානය දැනුම් දෙයි.
