ප්‍රබෝධා හෙට්ටිආරච්චි
ඉතාලියේ දී මේ දිනවල පැවැත්වෙන ජී 20 අන්තර් ආගමික සංසදයට එක්වීම සඳහා ඉතාලියේ එරට නිල සංචාරයක නිරත අග්‍රාමාත්‍ය මහින්ද රාජපක්ෂ මහතා රාජතාන්ත්‍රික හමුවීම් කිහිපයකට ද එක්වීමට කටයුතු යොදා තිබේ.
මේ අතර එම සංචාරයට සහභාගි වී සිටින විදේශ කටයුතු අමාත්‍ය ජී.එල්.පීරිස් මහතා එම සංසදයට සමගාමීව පැවැත්වෙන අතුරු හමුවකදී ආගමික නායකයින් කිහිපදෙනකු සමඟ සාකච්ඡාවල නිරත වී තිබේ.
විදේශ අමාත්‍යවරයා බොලොඤ්ඤාහි කාදිනල් අගරදගුරු මතේඕ මරියා සුප්පි හිමි ද සමඟ සාකච්ඡාවක් පවත්වා ඇත.
එමෙන්ම බක්තාෂි මුස්ලිම්වරුන්ගේ ලෝක නායකයා වන 8 වන බෙක්තාෂි දේදේබාබා හි හජ්ජි බබා මොන්ඩි ද මෙහිදී විදේශ ඇමති මහාචාර්ය ජී එල් පීරිස් සමඟ සාකච්ඡා පැවැත්වූ ආගමික නායකයින් අතර විය.
බොලොඤ්ඤාහි පැවැත්වෙන ජී20 අන්තර් ආගමික සංසදය පැවැත්වෙන්නේ ඉතාලි ජනාධිපති කාර්යාලයේ අනුග්‍රහය යටතේය.
මෙම හමුවට ඉතාලියේ වැඩබලන ශ්‍රී ලංකා තානාපති සිසිර සෙනවිරත්න මහත්වරු ඇතුළු පිරිසක් එක්ව සිටියහ.
