අසංක නවරත්න
මෙරට තුළ ලබන මස අග වනවිට ඔමික්‍රෝන් රැල්ලක් ඇතිවීමට බොහෝ දුරට ඉඩ ඇති බව රාගම වෛද්‍ය පීඨයේ ජ්‍යෙෂ්ඨ මහාචාර්ය අර්ජුන ද සිල්වා මහතා පවසයි.
බොහෝ පිරිසක් තුන්වෙනි මාත්‍රාව ලබා නොගෙන පැහැර හැර සිටින බවට තොරතුරු ලැබී ඇති බවත් එලෙස කටයුතු කිරීමෙන් ජීවිත අවදානම වැඩි විය හැකි බවත් අර්ජුන ද සිල්වා මහතා ප්‍රකාශ කළේය. එබැවින් මේ අවස්ථාවේදී ජනතාව තුන්වෙනි මාත්‍රාව කඩිනමින් ලබා ගැනීම ඉතාම වැදගත් බවද මහාචාර්යවරයා කියාසිටී.
ඔමික්‍රෝන් වයිරසය වේගයෙන් පැතිර යන නමුත් කොවිඩ් මර්දන එන්නත් මාත්‍රා ගණන සම්පූර්ණ කිරීමෙන් ඉන් සමාජයට ලොකු බලපෑමක් ඇති වනු ඇතැයි විශ්වාස කළ නොහැකි බව සඳහන් කළ ජ්‍යෙෂ්ඨ මහාචාර්යවරයා සඳහන් කළේය.
මෙම වයිරස ප්‍රභේදයෙන් දරුණු රෝග ලක්ෂණ මතු නොකරන හෙයින් එම ආසාදිතයින්ගෙන් 80%ක් පමණ නිවෙස්වලම රඳවා ප්‍රතිකාර ලබාදීමට හැකිවනු ඇතැයිද හෙතෙම කිය.
මුව ආවරණ පැළඳීම දුරස්ථභාවය පවත්වාගෙන යෑම යනාදීවූ සෞඛ්‍ය නීති පිළිපැදීම සඳහා ජනතාව වැඩි වැඩියෙන් උනන්දු කළ යුතු වන බවද කීවේය.
වෙනත් කොවිඩ් රැළි මෙන් නොව ඔමික්‍රෝන් රැල්ල ඉක්මණින් අවසන් වනු ඇති බවද හෙතෙම කීය.
