ප්‍රබෝධා හෙට්ටිආරච්චි
ඇෆ්ගනිස්ථානයේ කාබුල් ගුවන් තොටුපල ඉදිරිපිට විශාල පිපිරීමක් සිදුවූ බව අමෙරිකානු හමුදාව තහවුරු කරයි.
කාබුල් ගුවන් තොටුපලේ ජනාකීර්ණ දොරටුවලට මරාගෙන මැරෙන බෝම්බ යැයි සැකකෙරෙන පිපිරීම් දෙකක් එල්ල වූ අතර, පලා යාමට බලාපොරොත්තු වන මංමුලා සහගත සිවිල් වැසියන් අතර ලේ ගැලීමක් සිදු වූ බව වාර්තා විය.
තලේබාන් නිලධාරියෙකු පැවසුවේ අවම වශයෙන් ළමයින් ඇතුළු 13 දෙනෙකු මියගොස් 52 ක් තුවාල ලබා ඇති බවයි. ඉතාලි පුණ්‍යායතනයක් විසින් පවත්වාගෙන යන ශල්‍යකර්ම රෝහලක් පැවසුවේ තුවාල ලැබූ 60 කට වැඩි පිරිසකට ප්‍රතිකාර ලබා දෙන බවයි. තුවාල ලැබූ අය අතර එක්සත් ජනපද භටයින් ද සිටින බව පෙන්ටගනය පැවසීය.
මෙම පිපිරීම සිදුව ඇත්තේ එරටින් ජනතාව මුදාගැනීමේ මෙහෙයුම්හි නිරත අමෙරිකානු හමුදාව විසින් පුද්ගලයන් විශාල සංඛ්‍යාවක් ගුවන් යානයට නංවා ගැනීමේ මෙහෙයුමේ යෙදී සිටින අතරතුර ය.
මරාගෙන මැරෙන බෝම්බ ප්‍රහාරයක් ගැන අනතුරු අඟවමින් රටවල් කිහිපයක්ම කාබුල් ගුවන් තොටුපලෙන් වහා ඉවත් වන ලෙසට පෙරවරුවේ ජනතාවට දැනුම් දී තිබුණි. මේ වනවිට තලේබාන් ඇෆ්ගනිස්ථානයේ බලය තහවුරු කර සිටියද කාබුල් ගුවන්තොටුපල තවමත් අමෙරිකානු හමුදා යටතේ පවතී.
මරාගෙන මැරෙන බෝම්බකරුවන් ගුවන් තොටුපළට පහර දෙන බවට තර්ජනය කරන බවට තමන්ට බුද්ධි තොරතුරු ලැබී තිබූ බව අමෙරිකාව සහ පාක්ෂික බුද්ධි අංශ පවසා තිබේ.
