කොළඹ රිජ්වේ ආර්යා ළමා රෝහලේ දරුවන් යොදාගනිමින් කළ පර්යේෂණයකදී 20%ක් පමණ මන්ද පෝෂණයෙන් පෙළෙන බවට අනාවරණය කරගෙන තිබේ.
ළමා රෝග විශේෂඥ වෛද්‍ය දීපාල් පෙරේරා මහතා පවසන්නේ පසුගිය කාලය තුළ දරුවන්ගේ වයසට සාපේක්ෂව බර අඩුවීමේ තත්ත්වයන් දිගින් දිගටම දැකගත හැකිවීම නිසා මෙම පර්යේෂණය කිරීමට යොමුවූ බව ය.
මේ සඳහා 2 වාට්ටුවේ දරුවන් 53 දෙනකු පරීක්ෂණයට ලක්කළ බවත් ඉන් 11 දෙනකු මන්දපෝෂණයටත් 4 දෙනකු තීව්‍ර මන්දපෝෂණයටත් ගොදුරු වී සිටින බව හෙතෙම අනාවරණය කළේය.
දෙමව්පියන්ගේ ආර්ථික ශක්තිය අඩුවීම හා පෝෂණය පිළිබද අවධානය අඩුවීමත් මීට හේතුව බව විශේෂඥ වෛද්‍ය දීපාල් පෙරේරා මහතා කීය.
කුඩා දරුවන්ගේ පෝෂණය නිසි පරිදි ලබාදීමට චීස්, බටර් ආදි ආහාර ලබාදීම අවශ්‍ය නොවන අතර ඒ සඳහා කොස්, දෙල්, කොස්ඇට, ගොටුකොළ, මුරුංගා කොළ, හාල්මැස්සන්, බිත්තර, මෑකරල්, මුකුණුවැන්න ආදිය ඉතා ප්‍රමාණවත් බව විශේෂඥ වෛද්‍ය දීපාල් පෙරේරා මහතා අවධාරණය කළේය.
එමෙන්ම විටමින් ලබාදීමට දරුවන්ට මෙරට වැවෙන අඹ, රඹුටන්, වෙරළු, ජම්බු ආදී පලතුරු ඉතාම ගුණදායක බවත් විශේෂඥ වෛද්‍යවරයා සඳහන් කළේය.
