පැතුම් වික්‍රමරත්න
කොවිඩ්- 19 වෛසරය ආසාදනය වීම නිසා මියගොස් ඇති බවට තහවුරු කර ගන්නා සියලු පුද්ගලයන්ගේ ආදාහන කටයුතු රජයේ වියදමින් සිදු කිරීමට තීරණය කර ඇත .
මේ සම්බන්ධයෙන් ජනාධිපති ගෝඨාභය රාජපක්ෂ මහතා විසින් දැනටමත්සෞ ඛ්‍ය අංශ වෙත උපදෙස් ලබා දී ඇත.
සෞඛ්‍ය සේවා අධ්‍යක්ෂ ජෙනරාල්, වෛද්‍ය අසේල ගුණවර්ධන මහතා පවසන්නේ ජාති, ආගම් කිසිදු භේදයකින් තොරව රජයේ වියදමින් අවසන් කටයුතු කරන ලෙස ජනාධිපතිවරයා උපදෙස් ලබා දී ඇති බවයි.
ඊට අදාල වියදම් ආපදා කළමනාකරණ අමාත්‍යංශය විසින් දරනු ඇත.
කොවිඩ් වෛසරය ආසාදනය වී හේතුවෙන් මියයන පුද්ගලයන්ගේ මෘත ශරීර විශාල ප්‍රමාණයක්, ඥාතීන් විසින් ඉදිරිපත් නොවීම නිසා මෘත ශරීරාගාරවල ගොඩගැසී තිබෙන බව පසුගියදා වාර්තා වූ අතර එම මෘත ශරීර රජයේ වියදමින් ආදාහනය කරන ලෙස ජනාධිපතිවරයා දැනුම් දී තිබිණි.
එම පහසුකම මියයන සියලු කොවිඩ් ආසාදිතයන් සඳහා ලබා දෙන ලෙසයි මේ වනවිට ජනාධිපතිවරයා දැනුම් දී තිබෙන්නේ. ඒ අනුව මින් ඉදිරියට වෛසරය හේතුවෙන් මියයන සියලු දෙනාගේ ඥාතීන් හා භාරකරුවන්ගේ කැමැත්ත මත රජය මගින් ලබාදෙන මෙම වරප්‍රසාදය භාවිතා කිරීමේ හැකියාව ඇති බව සෞඛ්‍ය සේවා අධ්‍යක්ෂ ජෙනරාල්වරයා සඳහන් කර ඇත.
